Кыргыттар, дьахталлар, таптал уотугар умайа да сырыттаргыт, кытаатан, өйгүтүн наһаа сүтэримэҥ! Тоҕо диэтэр, кавалергынаан атырдьах салаатыныы арахсар түгэҥҥитигэр, ол тугунан диэлийэн тахсыа биллибэт. Куһаҕан киһи түбэспит буоллаҕына.
Ол курдук, Дьокуускай куоракка 35 саастаах киһи бу дьыл кулун тутар 31 күнүттэн муус устар 3 күнүгэр диэри кэм иһигэр урут көрсүһэ сылдьыбыт дьахтарыгар батсаап нөҥүө суруй да суруй буолбут. Өскөтүн 20 тыһ. солк. төлөөбөтөххүнэ, хоонньоспут видеобытын интэриниэккэ тарҕатыам диэн сааммыт.
Эдэрчи киһи ити дьайыылара РФ Холуобунай кодексатын 163-с ыст. 1 чааһыгар, ол эбэтэр, киһини саакка-суукка киллэриинэн суоһурҕанан, харчы түүрэйдээһиҥҥэ, сөп түбэһэллэр.
Бу чахчынан тэриллибит холуобунай дьыала суукка көрүллэн, бириигэбэр тахсыбыт.
Суут буруйдааҕы 1 сыл усулуобунай миэрэҕэ анаан тураан, 20 тыһ. солк. сууммалаах ыстараап төлүүргэ уурбут.
Бу туһунан Дьокуускай куорат борокуратуурата иһитиннэрдэ.
Онон, 20 тыһыынча үктэтэн ылаары, бэйэтэ 20 тыһыынча төлүүр буолбут.
Биһиги корр., «Саха сирэ» хаһыат, edersaas.ru
Хаартыска: интэриниэттэн