Борокуратуура уорганнара ааспыт 2016 сылга омуктар икки ардыларыгар сыһыан туһунан уонна экстремизмы утары сокуону тутуһууга 140 бэрэбиэркэ ыыппыта. Ол түмүгэр, сокуону кэһии 150-тан тахса чахчытын булбута.
Бу кэһиилэри туоратар туһуттан борокуруордар 40-тан тахса представление киллэрбиттэрэ көрүллэн, ол түмүгүнэн, 61 киһи дьиссипилиинэ эппиэтинэһигэр тардыллыбыта, 73 сэрэтии оҥоһуллубута.
Борокуруордар ордук элбэх кэһиини олохтоох салайыныы уорганнарын үлэтигэр итиэннэ интэриниэт ситимигэр булбуттара. Холобура, Алдан оройуонун бэрээдэги кэһиини сэрэтэр муниципальнай бырагырааматыгар миграннарга сыһыаннаах уонна омуктар икки ардыларыгар иирсээннэри таһаарбат буолууга туһуланар тэрээһиннэри ыытыы көрүллүбэтэх. Борокуратуура орооспутун кэнниттэн ону көннөрүннүлэр.
Маны тэҥэ, интэриниэт ситимигэр экстремистскэй матырыйааллары тарҕатыыны бохсор уонна бэчээккэ, тэлэбиидэнньэҕэ, араадьыйаҕа күннэтэ туох тахсарын кэтиир үлэ салҕанан барар.
Ол курдук, Кэбээйи борокуратуурата интэриниэккэ нацистскай символиканы көрдөрөр хартыыналары, хаартыскалары таһаарар веб-страницалары булбута. Улуус борокуратуурата ити веб-страницаларга бэчээттэммит иһитиннэриилэри тарҕатыы бобуулааҕын билинэр туһунан 19 сайабылыанньаны суукка ыыппыта. Суут ол сайабылыанньалары көрөн, сөптөөҕүнэн аахпыт.
Манна даҕатан эттэххэ, өрөспүүбүлүкэҕэ атын омук дьонун сөпсөөбөт, тулуйбат буолуу чахчылара, омугумсуйууга олоҕурбут иирсээн, атааннаһыы уһун кэм устатыгар тахсыбатылар.
Маныаха ааспыт сылга быраабы араҥаччылыыр уорганнар экстремистскэй хайысхалаах 3 холуобунай дьыаланы тэрийбиттэрэ. Холобура, 2016 сыл атырдьах ыйыгар РФ Холуобунай кодексатын 282-с ыст. 1 чааһынан (абааһы көрүүнү, өстөһүүнү көбүтүү, ону тэҥэ, киһи дьоһунун түһэрии) дьыала тэриллибитэ. Т. диэн гражданин олохтоох интэриниэт-сайтартан биирдэстэригэр итэҕэллээх дьону түһэрэр уонна кинилэргэ өстөһүүнү үөскэтэр ис хоһоонноох суруйуулары таһаарбыт.
Террордааһыны утары охсуһуу эйгэтигэр быһыы-майгы хайдаҕын борокуруордар эмиэ бэрэбиэркэлииллэр. Ол түмүгэр, сокуону кэһии 800-тэн тахса чахчытын булан, 142 киһи дьиссипилиинэ эппиэтинэһигэр тардыллыбыта, суукка 240 ирдэһэр сайабылыанньа ыытыллыбыта. Сүрүн кэһиилэр олох-дьаһах эбийиэктэригэр, дьон тоҕуоруһар сирдэригэр террористическай дьайыылартан көмүскэнии үлэтин хааччыйыы мөлтөҕөр сыһыаннаахтар. Бу хайысханан 3 холуобунай дьыала тэриллибитэ.
Холобур быһыытынан, Г. диэн гражданиҥҥа РФ Холуобунай кодексатын 205.2 ыст. 1 чааһынан тэриллибит дьыаланы этиэххэ сөп. Бу киһи террордааһыны өйүүрүн, биһириирин аһаҕастык биллэрэн, дьону оннук дьайыыларга ыҥыран, суут уурааҕынан көҥүлэ быһыллыбыта.
СӨ Борокуратууратын пресс-сулууспата.
Хаартыска: интернеттэн.