Нерюнгри куорат олохтооҕо биир саайтка Чебоксары куоракка «Ямаха» снегоходу атыылыылларын аахпыт. Уонна атыылааччыны кытта сибээстэспит.
Онуоха атыылааччы киниэхэ «Ямаха» хайдах туруктааҕын видеоҕа устан ыыппыт. Атыылаһааччы ол видеону көрөн, барытын сөбүлээн, икки өттүттэн атыы-тутуу дуогабарын түһэрсибиттэр.
Онтон атыылааччы табаары анал транспортнай компания нөҥүө ыытарын туһунан эппит. Атыылаһааччы ол компанияҕа эрийэн, снегоход ыытыллаары турарын туһунан бигэргэтиини истэн, эрэх-турах санаммыт.
Киэһэтигэр атыылааччы снегоходу тиэйбиттэрин туһунан видео ыытан көрдөрбүт. Дьэ, ол кэнниттэн атыылааччы харчытын киниэхэ ыыппыт.
Сарсыныгар атыылааччыны кытта сибээстэһээри гыммыта, төлөпүөнүн нүөмэрэ арахсыбыт. Икки күнүнэн аны транспортнай компанияҕа эрийбитин, харчыта төлөммөтөҕүн иһин ыыппаппыт диэбиттэр. Компания менеджерэ снегоходу атыылыыр киһи нүөмэрин ыыппыта, анараа атыылааччы нүөмэриттэн атын эбит.
Дьэ, онно бу киһи өйдөөбүт, түөкүттэр сиэртибэлэрэ буолбутун. Уонна полицияҕа тыллаабыт.
Полиция сэрэтэр: убаастабыллаах гражданнар! Интэриниэт ситиминэн табаар атыылаһаргытыгар, өҥөлөрүнэн туһанаргытыгар, болҕомтолоох уонна сэрэхтээх буолуҥ. Пааспаргыт дааннайдарын, каартаҕыт ПИН-кодтарын этэн биэримэҥ. Табаары атыылаһаргытыгар харчыгыт сүүс бырыһыанын көрдүүр буоллахтарына, сэрэхэдийиҥ. Эрэллээх интэриниэт-маҕаһыыннарга харчы төлөбүрүн атын ньымалара эмиэ бааллар. Маҕаһыын туһунан дьон санаатын ааҕыҥ, интэриниэт-маҕаһыыннар «хара испииһэктэрэ» бааллар, онно киирэн көрүҥ. Бэйэҕитин албыннатымаҥ!
Биһиги корр., «Саха сирэ» хаһыат, edersaas.ru
Хаартыска: интэриниэттэн.