«Интэриниэтинэн билсиһэр сэрэхтээх» диэн бастакы иһитиннэриибит сайтпытыгар бу дьыл атырдьах ыйын 2 күнүгэр бэчээттэммитэ. Сэрэтэн да диэн — кэрэ аҥаардар син биир киирэн биэрэ тураллар.
Санатар буоллахха, ол иһитиннэриигэ Хаҥалас улууһугар икки кыыс бириэмэтин үөрэ-көтө атаарыан баҕаран, биир сууккаҕа кыбартыыра куортамнаабытын, кинилэргэ сити күн ыалдьыттыы диэн, Дьокуускай куораттан икки уол тигинэтэн кэлбитин, бу уолаттары кытта кыргыттар ити күн эрэ иннинэ интэриниэтинэн билсибиттэрин туһунан суруйбуппут.
Итинник көрсүһүүлэргэ буоларын курдук, билсиһиилэрин итирдэр утаҕынан бэлиэтээбиттэр. Онтон бары утуйбуттарын кэнниттэн, биир уол өр саарыы барбакка, кыргыттар көстүүгэ сытар суотабай төлөпүөннэрин ылбыт уонна атаһын уһугуннаран, иккиэн атахха биллэрбиттэр. Кыргыттар сарсыарда уһуктан көрбүттэрэ — уолаттара да суохтар, төлөпүөннэрэ да мэлигир. Тута полицияҕа тыллаабыттар. Уорууга уорбаланар биир уол тутуллубута, холуобунай дьыала тэриллибитэ.
Оттон Дьокуускай куоракка эмиэ итиниэхэ маарынныыр түбэлтэ таҕыста. Биир кыыс социальнай ситиминэн билсибит уолун кытта көрсүһэн, билсиһиилэрин бэлиэтээбиттэр. Оттон «банкеты салҕыы» диэн кыыс дьиэтигэр ыҥырбыт. Онно тиийэн эмиэ итирдэр утаҕы испиттэр, бырааһынньыктаабыттар.
Кыыс утуйбутун кэнниттэн уол кини «Sony» ноутубугун уоран барбыт. Онтун 5 тыһ.солк. суумаҕа батарбыт.
Бу туһунан уонна «уоруу» ыстатыйанан холуобунай дьыала тэриллибитин СӨ ИДьМ-тын пресс-сулууспата иһитиннэрдэ.
Кыргыттар, бука диэн, хаһан да харахтаабатах билбэт дьоҥҥутун кытта онно-манна барсымаҥ, бэйэҕитигэр ыҥырымаҥ! Оннук көрсүһүүлэр тугунан диэлийэн тахсыахтара биллибэт. Уордарыы диэн — ити өссө кырата, араас куһаҕаҥҥа түбэһиэххэ сөп. Билиҥҥи үйэҕэ киһи билэр да дьонуттан күүппэтэҕин көрүөн сөп. Ону өйдүүргүт буоллар!
Биһиги корр., «Саха сирэ» хаһыат, edersaas.ru
Хаартыска: интэриниэттэн.