Бүгүн сарсыардаттан батсаабынан Интэриниэт ситимигэр атыыр тайах муоһуттан иилистэн турар хаартыската тарҕанна. Бу түбэлтэ Өймөкөөн улууһун сиригэр-уотугар Күбэмэ үрэҕин туоруур муостаттан чугас (Томпо — Өймөкөөн улуустарын быысаһыыта), айан суолун кытыытыгар 20-чэ миэтэрэлээх сиргэ тахсыбыта сабаҕаланар. Экология министиэристибэтиттэн исписэлиистэр ону чуолкайдыы уонна кыылы “быыһыы” айаннаатылар.
СӨ Инновацияҕа, сыыппара сайдыытыгар уонна инфокоммуникация технологиятыгар министиэристибэтиттэн туоһуласпыппытыгар: “Көрдүү сылдьабыт”, — диэн чуолкай хоруйу биэрбэтилэр. Арай, тайах тоҕо сир үрдүгэр аһаҕас сытар оптоволокно утаҕар, туһахха курдук, иҥнибитин маннык быһаардылар:
— “Аллараа Бэстээх – Магадан” хайысхатынан тардыллыбыт сибээс ситимин “Импульс” НПХ” ХЭУо көрөр-истэр. Бу тэрилтэ бырайыак соҕотох инвесторынан буолар. “Импульс” НПХ” ХЭУо тутуу уонна ситими үлэҕэ киллэриини 2020 сылга диэри түмүктүүргэ былаанныыр. Бастакы бырайыагынан сибээс ситимэ Магадан куоракка диэри быһаччы тардыллыахтаах буолан, өрөспүүбүлүкэ кэккэ нэһилиэнньэлээх пууннарын Интэриниэт ситимигэр холбооһун көрүллүбэтэҕэ. СӨ бырабыыталыстыбатын уонна муниципальнай тэриллиилэрин дьаһалталарын көрдөһүүлэринэн, “Импульс” НПХ” ХЭУо эбии тэрил уонна матырыйаал атыылаһан, сир учаастагын түүлэһэн, тутуу үлэтин тэрийэн, сибээс оптическай ситимэ ааһар сирин аттынааҕы нэһилиэнньэлээх пууннары холбуурга быһаарбыта. Этиллибитин курдук, инвестор ситими Магадаҥҥа тириэрдэр соруктааҕынан, Уус Ньара бөһүөлэгэр опттоволокно ситими 2017 сыл муус устарга киллэрээт, сүрүн күүһүн Магадан уобалаһыгар бырахпыта. Ол үлэтин быйыл саас муус устарга түмүктээтэ. Томпо уонна Өймөкөөн улуустарыгар оптическай ситим “быстах” схеманан тардыллыбыта. Ол инвестор улуустар дьаһалталарыттан кабелы сири хаһан уурарыгар уонна итинэн ситим быстарын хааччыйар үлэни толороругар кэккэ көҥүллүүр докумуоннары ылбатаҕыттан төрүөттээх. Билигин “Импульс” НПХ” ХЭУо министиэристибэ көмөтүнэн ирдэниллэр туһааннаах докумуоннары оҥорторо сылдьар.
Василий НИКИФОРОВ, edersaas.ru