Бэлиитикэ Маны аах

Интэриниэт олоҕу толору солбуйар кыаҕа суох

Дойду бэрэсидьиэнэ Владимир Путин сыллата ыытар улахан пресс-кэмпириэнсийэтин биэрдэ. Атын тиэмэлэри сэргэ үөрэх туһунан ыйытыыга хоруйдууругар интэриниэт үүнэр ыччакка дьайыытын таарыйда.   

Арассыыйатааҕы социальнай ситимтэн блогер туран цифровой сервис сайдыыта улахан кыахтааҕын, ол иһигэр үөрэх салаатыгар көмөлөөҕүн, үүнэр ыччаты аралдьытар, оонньуур контент нөҥүө үөрэтэр, иһитиннэриини тиэрдэр кыахтааҕын ыйан туран, Владимир Путинтан ыччат маннык эйгэҕэ сыстыытын, үлэлэһиитин биһириирин дуу эбэтэр үүнэр көлүөнэ итинтэн кэхтэр (деградация) дии саныырын дуу ыйытта.

— Уопсайынан, киһи аймах өрүү сайдан иһэр  уонна оҕолор төрөппүттэринээҕэр өрүү ордук, өйдөөх буолаллар. Бу көстөн турар чахчы. Тоҕо диэтэххэ, билии-көрүү хаҥаан, инфомацияны тиэрдии тупсан иһэр. Онтон киһи креативнай кыаҕа үрдүү турар. Кини түргэнник сүүрэрин, үөһэ ыстанарын ааһан, өссө интэриэһинэйдик, креативнайдык толкуйдуур. Билигин үөрэх, ордук кыра саастаах оҕолорго оонньууга тирэҕирэр. Биллэн турар, эн эппит кыахтарыҥ туһаныллыахтаахтар. Ол иһин дойду үрдүнэн “широкополоснай интэриниэти” киллэрэргэ анал былааны оҥоробут, үп көрөбүт. Билигин оскуолаларга туһааннаах үлэлэри бүтэриэхтээхтэр, интэриниэт тыа сиригэр барытыгар баар буолуохтаах. Манна 24 млрд. солк. үп көрүллүбүтэ.

Боппуруос туһалаах контены оҥорорго туһаайыллар. Эдэр дьон интэриниэтинэн “ыалдьыбаттарын”, олохторун сарсыардаттан киэһээҥҥэ диэри интэриниэт ситимҥэ олорон атаарбаттарыгар, хамсаналларыгар, успуордунан дьарыктаналларыгар, түмэллэргэ, тыйаатырдарга сылдьалларыгар, олоҕу толору олороллоругар баҕарабыт. Эһиги эппит араас интэриниэт ситимнэргит, кыаххыт дьиҥнээх олоҕу виртуальнай олоҕунан солбуйбакка эрэ байытыахтаахтаахтар, ситэрэн биэриэхтээхтэр”, — диэн бэрэсидьиэн хоруйдаата.

 

Людмила ПОПОВА, “Саха сирэ” хаһыат, edersaas.ru

Хаартыска: stavlider.ru

0
0
Telegram @edersaas20