Урбааҥҥа мээнэ киһи кэлбэт. Бүддьүөт үлэһиттэрин курдук бэлэм уоппусканы, социальнай көмүскэли күүппэккэ, олох ыарахаттарыттан чаҕыйбакка, тус бэйэлэрин кыахтарыгар эрэ эрэнэн, кытаанах дьулуурдарынан, дьүккүөрдэринэн, сатабылларынан үлэлииллэр. Дьоҥҥо хамнас төлүүллэр, ол быыһыгар баантан ылбыт кирэдьииттэрин сабаллар. Онон бу эйгэҕэ ис кыахтаах эрэ дьон табыллан үлэлиир.
edersaas.ru
«Сахамедиа» холдинг тэрийэр «Саха сирин киэн туттуута – 2019» норуот бириэмийэтигэр «Урбаанньыт» түһүмэххэ Олег Юденко интэриниэт куоластааһыҥҥа 1613 куолаһы ылан, үһүс миэстэҕэ тиксибитэ.
Кини 1981 сыллаахха Алдаҥҥа төрөөбүтэ. Новосибирскайдааҕы тутуу уонна архитектура университетын бүтэрбитэ, идэтинэн экэнэмиис-менеджер. Кэтэх урбаанньыт быһыытынан, нолуогу, үбү-харчыны ааҕыыга сүбэлиир, көмөлөһөр өҥөнү оҥоруунан дьарыктанар.
Үөрэҕин бүтэрэн баран дойдутугар эргиллэн кэлэн, уонча сыл нолуок сулууспатыгар иниспиэктэринэн, онтон РФ Уһук Илин сайдыытын министиэристибэтигэр, Судаарыстыбаннай уонна муниципальнай өҥөнү оҥорор киин Алданнааҕы салаатыгар үлэлээбитэ. 2014 сылтан «Рассвет» урбааны арыаллыыр киин тэрийэн, тус бэйэтигэр үлэлиир.
Күн бүгүн кини дьоҕус урбаан 150 тэрилтэтигэр араас эрэгийиэннэргэ сүбэлиир, үп-харчы эйгэтигэр көмөлөһөр өҥө оҥорор. Интэриниэт нөҥүө, дьиэҕэ олорон. Инникитин өрөспүүбүлүкэҕэ креативнай экэниэмикэ уонна Киһи хапытаала сайдарыгар урбааҥҥа уонна социальнай эйгэҕэ ылсан үлэлиэн баҕарар.
Марианна Тыртыкова, «Саха сирэ», edersaas.ru