Ааспыт нэдиэлэҕэ «Арассыыйа – мин устуоруйам» историческай пааркаҕа «Өйдөөх куорат – олорорго табыгастаах эйгэ» диэн Уһук Илин таһымыгар Дьокуускайга буолбут икки күннээх пуорум кэмигэр IT-хампаанньалар быыстапкаларын кэрийэн көрдүм. Аныгы тиэхиньикэ сайдыытын киһи эрэ сөҕөр, ол курдук бүгүн инновационнай бырайыактары олоххо киллэрээччилэртэн биирдэстэрин билиһиннэрэбин.
edersaas.ru
Арсен Степанов, IoT платформаны оҥорон таһаарааччы:
-Биһиги платформабыт “өйдөөх» тэриллэри кытта үлэлииргэ кыах биэрэр, холобур, анал бырагыраама салгын төһө сииктээҕин, ырааһын, эбэтэр кирдээҕин хонтуруоллуон сөп. Ону таһынан, бэлэм тэриллэри холбуубут (GPS трекер о.д.а.), биитэр килийиэн тугу баҕарарын таҥан биэрэбит.
LoRaWan ситиминэн үлэлиир базовай ыстаансыйалар серверга улахан дааннайы мунньаллар уонна сыһыарыылары кытта холбоһон, интэриниэт хаппат сиригэр тиийэллэр. Кыра датчик атыылаһан баран базовай ыстаансыйаҕа холбоноллор уонна ыраах ойуурга, туундараҕа баралларыгар укта сылдьаллар, оччотугар суоллара-иистэрэ, ханна сылдьаллара 15 км иһинэн барыта көстө турар. Итинник трекердэри сылгы үөрүгэр, таба ыстаадатыгар кэтэрдиэххэ син, — диэн кэпсиир.
Ону таһынан, парковкаҕа массыынаны туруорарга ханна миэстэ баарын ыйар, бөх контейнера төһө туолбутун биллэрэр, уулусса лаампаларын халлаан хараҥардаҕына бэйэтэ холбуур “өйдөөх» тэрил араас көрүҥэ баар.
IT-паарка резиденнэрэ итинник бииртэн биир дьон олоҕун чэпчэтэр, саҥа үктэлгэ таһаарар датчиктары оҥороллор, таҥаллар, холбууллар.
Марианна Тыртыкова «Саха сирэ», edersaas.ru