Өй үлэтэ үгүс калорийы эрэйэр диэн этэллэр. Биһиги бүгүн СӨ Билим дьоҕус академиятын остолобуойугар өҥөйөн аастыбыт. Интеллектуальнай оонньуу кэмигэр манна 300-чэкэ киһини аһаталлар. Айдарыылаах оҕолору тугунан аһаталларын, ыалдьыттар тугу ордук сөбүлээн сииллэрин туһунан остолобуой сэбиэдиссэйэ Лена Яковлева кэпсээтэ.
edersaas.ru
— Лена Робертовна, өй үлэтинэн дьарыктанар оҕолорго кимнээх аһылыгы астыыллар? Норуоттар икки ардыларынааҕы интеллектуальнай оонньууга остолобуой үлэтин туһунан кэпсии түһэриҥ буоллар.
— Интеллектуальнай оонньуу кэмигэр биһиэхэ икки остолобуой үлэлиир – олорор уонна үөрэтэр-лабораторнай куорпуска. Күннэтэ аҕыс асчыт, аҕыс иһит сууйааччы, икки муоста сууйааччы уонна биир оробуочай тахсар. Саха сиринээҕи чинчийэр оскуола түмүктэниэр диэри икки куорпуһунан 300-чэкэҕэ тиийэ киһини аһаппыппыт, оҕолор барбыттарын кэннэ – 180.
— Менюга туох баарый?
— Меню, Роспотребнадзор бигэргэппит испииһэгинэн барыларыгар биир. Норуоттар икки ардыларынааҕы интеллектуальнай оонньуу кэмигэр көннөрү бүлүүдэлэр, вегетарианецтарга эмиэ. Сарсыарда хааһы икки көрүҥэ, араас быһыллыбыт аһылыктар, сырдар, йогурт. Шведскай остуол, оҕолор бэйэлэрэ тугу баҕаралларынан талан ылаллар. Биирдиилээн оҕоҕо үүтэ суох хааһыны, этэ суох миини, о.д.а. буһарабыт. Күнүскү аһылыкка миин икки көрүҥүн, куурусса, балык, оҕуруот аһа буолар. Күҥҥэ биэстэ аһатабыт, ол эрээри, оонньуу бырагыраамата ыгым буолан, оҕолор түөртүүр эбиэти, хойукку киэһээҥҥи аһылыгы кытта бииргэ биэрэрбитигэр көрдөһөллөр.
— Оонньуу кыттааччылара тугу ордук сөбүлээтилэр? Уонна бородууктаны тиэрдээччилэргит кимнээҕий?
— Тиэрдээччилэрбит олохтоох тэрилтэлэр — «Скиф», «Гормолзавод», «Амсай» атыы дьиэтэ, Мохсоҕоллоох уонна Нөмүгүтээҕи килиэп собуоттара. Оһох иһигэр буһарыллыбыт аһылык, кондитерскай, иэдьэгэй көрүөх бэтэрээ өттүгэр бүтэр. Барыта сибиэһэйтэн сибиэһэйи эрэ аҕалабыт. Хонтуруол – кытаанах.
— Хонтуруол диэбиккэ дылы, куукунаҕа туох бэрээдэктээххит? Бука, тыҥ хатыыта туран эрдэххит?
— Остолобуой үлэтигэр саамай сүрүнэ — ыраас уонна дьиссипилиинэ. Асчыттарбыт бары уопуттаах дьон, 4-5 категориялаахтар. Билим дьоҕус академиятыгар 15 сыл ыстаастаах үлэһиттэр бааллар. Кэлэктиипкэ туох да саарбаҕа суох үрдүк ааттаах-суоллаах дьон үлэлииллэр, барыта чопчу, бэрээдэгинэн. Оттон уонна хас биирдии бүлүүдэни тапталынан астыыбыт, онон барыта минньигэс, тотоойу. Оҕолор сөбүлүүллэр.
Интеллектуальнай оонньуулар пресс-киинэ.