Бүгүн Саха Өрөспүүбүлүкэтин Инновацияҕа, цифровой сайдыыга уонна инфокоммуникационнай технологияларга министиэристибэтин салайар салааларын иннигэр отчуота буолла. Миниистир Анатолий Семенов ааспыт сыл түмүктэрин таһаарда уонна чугастааҕы сыллар былааннарын кытта билиһиннэрдэ.
“Быйыл 2000 км сибээс волокно-оптическай линията тутулунна, — диэн бэлиэтээтэ миниистир. – “Бүлүүтээҕи экспресс” улахан бырайыак түмүктэнэн, үрдүк тэтимнээх интэриниэккэ Сунтаар, Ньурба, Үөһээ Бүлүү уонна Бүлүү улуустара холбоннулар. Дьокуускайтан Нам улууһун сэлиэнньэлэрин нөҥүө ВОЛС Кэбээйи улууһун Сангаар бөһүөлэгэр тиийдэ”. Дакылаатыгар Анатолий Семенов үс-түөрт сыл устата Саха сирин олохтоохторун 85 бырыһыанын киэҥ балаһалаах интэриниэккэ холбуур соруктаахтарын эттэ. Ол курдук, Хаҥалас улууһун Иһит сэлиэнньэтигэр, Уус Маайа бөһүөлэгэр, Өлөөҥҥө диэри оптиканы тутуохтара. Улуустарга ВОЛС кэлиитэ 4 G стандартаах мобильнай сибээс тиһигин кэҥэтиини кытта сибээстээх. Бүгүн түргэн интэриниэт хабар сиригэр Саха сирин олохтоохторун 64,7 быр. олорор.
Арассыыйа Бэрэсидьиэнин ыам ыйдааҕы ыйааҕар олоҕуран, экэниэмикэни цифровизациялааһын дьоһун суолталаах көрдөрүүлэриттэн биирдэстэринэн электроннай судаарыстыбаннай өҥөлөрүнэн туһанар дьон буолаллар. Миниистир иһитиннэрэринэн, госөҥө порталыгар регистрацияламмыт киһи ахсаана 40 % элбээтэ. Бүгүн тиһиккэ 14 үөһээ саастаах өрөспүүбүлүкэ 585 тыһыынча олохтооҕо регистрацияланна. “Чугастааҕы сылларга проактивнай электроннай өҥөлөрү тэрийии тумус суолталаах буолуоҕа”, — диэтэ Анатолий Аскалонович.
Сонуннары киэҥник тарҕатар ситимнэргэ тохтоотоххо, “Якутия24” иһитиннэрэр телеканаалы суукканы эргиччи үлэлэтии, “Улус.Медиа” оройуоннар хаһыаттарын сайтарын тэрийии былаана ситиһилиннэ. Ахсынньы ыйга ыытыллыбыт “MediaHills” хампаанньалар чинчийиилэригэр олоҕуран, “Саха” НКИК уонна” Якутия24” өрөспүүбүлүкэҕэ көрүүлэрин ахсаанынан инники күөҥҥэ сылдьаллар. Ону сэргэ, быйыл 17 улуус хаһыатын «Сахабэчээккэ» холбооһун саҕаламмыт. Сыыйа 16 улуус хаһыатын холбуур соруктаахтар.
“Бичик” национальнай кинигэ кыһата былырыын 151 кинигэни 404 тыһыынча экземпляр тирааһынан таһаарда. Маныаха Анатолий Семенов кыһа кинигэлэри электроннай көрүҥҥэ көһөрүүтүн биһирээтэ. Бүгүн кинигэлэри
кыһа саайтыгар, ону тэҥэ, мобильнай тэриллэр сыһыарыыларыгар киирэн көрүөххэ сөп.
Ааспыт сылы үөрүүлээхтик түмүктээһин ИТ-парканы арыйыыны кытта сибээстээх. Бүгүн ИТ-паркаҕа 25 резидент ылылынна, быйыл кинилэр ахсааннарын 40 тиэрдиэхтэрэ. Стартаптары таһаарыыга уонна инвестициялары тардыыга Уһук Илиҥҥэ соҕотох акселерационнай бырагыраама оҥоһулунна. Маны сэргэ улуустарга 2024 сылга диэри 17 ИТ-киин аһыллыаҕа.
Миниистир сүрүн былааннарга тохтоон, олунньу ый саҥатыгар Дьокуускайга уонна Жатайга “112” нүөмэринэн экстреннэй сулууспалары ыҥырар тиһик үлэҕэ киириэ диэтэ. Сыл устата бу тиһик өрөспүүбүлүкэҕэ барытыгар киириэхтээх.
Цифровой тэлэбиидэнньэ хаппат сиригэр олорор 9700 ыалга спутниковай тэлэбиидэнньэ тэрилин атыылаһыыга субсидия көрүллэрин туһунан сонуну дьон сэргээтэ. Биллэрин курдук, бэс ыйын 3 күнүгэр федеральнай канааллар цифровой биэриигэ көһүөхтэрэ. Маныаха өрөспүүбүлүкэ 50 тыһыынча кэриҥэ олохтооҕо манан хабыллар кыаҕа суох. Кинилэргэ анаан “Орион” уонна “НТВ-ПЛЮС” спутниковай тэлэбиидэнньэ оператордарын кытта телеканааллар босхо пакеттарыгар холбонууга уонна тэрили чэпчэтиилээх атыылаһыыга сөбүлэһии түһэрсиллибитэ.
Тэрээһин түмүгэр Анатолий Семенов урукку миниистир Александр Борисовка РФ Сибээскэ министиэристибэтин уонна Саха Өрөспүүбүлүкэтин Ил Дарханын Махтал суругун туттарда.
edersaas.ru