“Хотугу Синергия” ыччат форумугар бүгүн инновация, цифровой сайдыы уонна инфокоммуникационнай технология миниистирэ Анатолий Семенов “Я-ИНЖЕНЕР” хайысха кыттааччыларын кытта көрүстэ. Саха сиригэр цифровой сайдыы туһунан кэпсэттилэр. Семенов этэринэн, цифровизация олох бары эйгэтин хабар – доруобуйа харыстабылыттан саҕалаан тыа хаһаайыстыбатыгар тиийэ.
— Дьокуускай цифровой куорат буоларга бэлэм. Ирбэт тоҥ үрдүгэр турар соҕотох цифровой куорат буолуохтаах. Биһиги онно федеральнай үбү туһаныахпытын баҕарабыт. Бу сыалбытын ситиһэр наадатыгар инфраструктура наада – үөрэхтээх дьон, IT-кииннэр, IT-былаһааккалар, коворкинг-кииннэр уо.д.а. Хас биирдии оскуолаҕа билигин программистары уонна дизайнердары үөрэтэр кылаастары арыйар тоҕоостоох. Олох тэтимин сиэринэн, биһиги цифровой сайдыыны кытта тэҥҥэ баран иһэбит. Холобур, судаарыстыбаннай өҥө саайтын нөҥүө тайах лицензиятыгар уочарат олохтообуппут үтүө түмүктэннэ. Билигин паром кыһалҕатын быһаарар курдук, төлөпүөҥҥэ электроннай сыһыарыы оҥоруохтаахпыт.
Санатан эттэххэ, атырдьах ыйын 7-11 күннэригэр Аллараа Бэстээххэ “Хотугу Синергия” форум буола турар.
Грант бырайыагы олоххо киллэриигэ биирдиилээн кыттааччыга харчынан субсидияҕа сэртипикээт быһыытынан бэриллэр. Үс хайысханан (инженердэр, урбаанньыттар уонна волонтердар) 14 грант олохтонно. Уопсай суумата — 1 мөл. солк.
Надежда Самсонова, «Саха сирэ» хаhыат, edersaas.ru