СӨ Ил Дархана Айсен Николаев дуоһунаһыгар үлэлээбитэ биир сылынан уонна Арктика зонатынан ааҕыллар улуустар ахсааннара эбиллэн, дьон-сэргэ санаатын үөрэ-көтө үллэстэр.
edersaas.ru
Иннокентий Винокуров, медицинскэй наука доктора, СӨ үтүөлээх бырааһа, прозаик, Арассыыйа Суруйааччыларын сойууһун чилиэнэ:
-Билигин, Арассыыйабыт экэниэмикэҕэ, социальнай сайдыыга, бэлиитикэҕэ киэн хардыыны онорор кэмигэр Сахабыт Сирин Ил Дарханынан эрчимнээх, киэн билиилээх, аныгылыы өйдөөх-санаалаах эдэр киһи Айсен Николаев буолбута кэрэхсэбиллээх. Мин санаабар, бу улахан экономическай сайдыы барарыгар Айсен Сергеевич курдук туруулаһар киһи баар буолбута бүтүн Сахабыт сирин дьолугар буолуо диибин.
Ол курдук, СӨ бырабыыталыстыбатыгар эрчимнээх, үрдүк таһымнаах саҥа салайааччылар анананнар, ис санааларынан ылсан күргүөмнээхтик үлэлээн эрэллэриттэн киһи үөрэр, санаата көтөҕүллэр. Бу биир сыл иһигэр улахан ситииһиилэр бааллар. Ол курдук, үп-харчы өттүнэн Сахабыт сирэ урукку иэстэрин сабан, көнөр суолга үктэннэ. Маны таһынан улахан тутуулары саҕалаа,н онкология, кардиология киииннэрэ, оскуолалар баар буолар кыахтаннылар.
Аллара Халымаҕа урут тохтотулла сылдьыбыт хорҕолдьун рудата хостонор буолла. Аны туран, Арктикаҕа сыһыаннаах туспа министиэристибэ тэриллиитэ — кэскиллээх быһаарыныы. Итинэн сиэттэрэн, Сахабыт сирин Арктикатааҕы зоната биллэ кэҥээтэ. Ол иһигэр, мин төрөөбүт дойдум Өлөөн улууһа киирдэ.
Тыа сиригэр саҥалыы көрүүлээх-истиилээх хамсааһыннар саҕаланнылар. Ол курдук, тыа хаһаайыстыбатын сайдыыта нэһилиэктэр сайдыыларын кытта ыга ситимнэнэн эрэр. Былыргы дьон этэллэригэр дылы, «Ынах үүтэ — ынах тылыгар». Ону сөпкө өйдөөн, Айсен Сергеевич: «Биһиги ынахпытын аһаппаппыт, кураанах оту эрэ сиэтэбит», — диэбитэ оруннаах. Ол иһин, билигин ынахтан үрдүк хаачыстыбалаах уонна таһаарылаах бородууксуйаны ылар туһуттан элбэх үлэ барыахтаах. Уопсастыба сайдыытыгар эмиэ кэскиллээх хамсааһыны оҥордо. Ол курдук, 2019 сылы Сомоҕолоһуу сылынан биллэрбитэ Саха сиригэр олорор дьону баартыйанан, улууһунан, омугунан хайдыспакка, түмсүүлээх буоларга кэскиллээх саҕалааһын.
Надежда ЕГОРОВА, edersaas.ru