Иннокентий Тарбахов: Дьиэҕэ олорон чугас дьоҥҥутун минньигэс аһынан күндүлээҥ
Коронавирус дьаҥа киһиттэн киһиэхэ сыстарынан биллэр. Онон дьиэҕэ олоруу, уопсастыбаннай сиргэ сылдьыбат буолуу билиҥҥи олохпут ирдэбилэ буолла.
edersaas.ru
САССР норуотун хаһаайыстыбатын үтүөлээх үлэһитэ, “Гражданскай килбиэн” хаһаайына, Саха сирин бочуоттаах олохтооҕо, “Тыгын Дархан” эрэстэрээн асчыта Иннокентий Тарбахов өрөспүүбүлүкэ олохтоохторун сыстыганнаах ыарыы тарҕана турар кэмигэр дьиэҕэ олорон чугас дьоҥҥутун минньигэс аһынан күндүлээҥ диэн ыҥырар.
- Сахам сирин олохтоохторун, маннык ыксаллаах быһыы-майгы буола турар кэмигэр дьиэҕитигэр олоруҥ диэн ыҥырабын. Ил Дархан Айсен Николаев сарсыарда аайы өрөспүүбүлүкэҕэ коронавирус балаһыанньатын туһунан кэпсиирин бары истэ-көрө олоробут. Кытай омуга истигэн буолан, бу ыарыыны кыайан эрэр. Онон атын омук уопутун ылынан, бары биир киһи курдук быраастар, Роспотребнадзор этиилэрин толорон, дьиэҕэ олордохпутуна эрэ, бу дьаҥ тарҕаныыта тохтуоҕа.
Дьиэҕэ олорон араас минньигэс аһынан чугас дьоҥҥутун күндүлээҥ. Билиҥҥи интернет үйэтигэр, араас саайтарга, социальнай ситимнэргэ ас эрэсиэбин эгэлгэтин булуохха сөп.
Биһиги, “Тыгын Дархан” эрэстэрээн онлайн кулинария оскуолатын арыйдыбыт. Эрэстэрээн инстаграм сирэйигэр киирэн, хас бэнидиэнньик, сэрэдэ, бээтинсэ аайы күнүс 15 чаастан быһа эпииргэ тахсан, араас минньигэс аһы астыырга үөрэтэбит.
Ньургуйаана Иванова, “Саха сирэ” хаһыат, edersaas.ru
Хаартыска СИА