Бүгүн Өймөкөөн улууһун олохтоохторугар СӨ Бырабыыталыстыбатын отчуота буолла.
Өймөкөөн улууһун олохтоохторо кинилэри долгутар араас ыйытыылары биэрдилэр. Ол курдук, улуус киинин олохтоохторо иһэр уу хаачыстыбатын, баһаарынай депону саҥардыыны, хаарбах дьиэлэртэн көһөрүүнү, сапыраапка ыстаансыйатын тутууну, иһэр уу ыстаансыйатын саҥардыыны, Аартык бөһүөлэгин олохтоохторо айан суолун аартыгар олорор буолан, суол туругун, бөһүөлэктэрин инники дьылҕатын боппуруостарын туруорустулар.
Төрүт нэһилиэгин дьаһалтата кыһыҥҥы кэмҥэ айанныыр суолу сылы төгүрүччү сылдьар суол статустаах буоларыгар, холбоһуктаах тэрилтэ буолбут уһуйаан уонна оскуола саҥа дьиэтин, култуурунай-спортивнай киин тутуллуутун дьүүллэстилэр.
Үчүгэй нэһилиэгин олохтоохторо саҥа хочуолунай, амбулатория тутуллуутун, саҥа тутулла турар оскуола миэбэлинэн хааччыллыытын туруорустулар. Биир сонун этии быйыл отчуокка иһилиннэ. Ол Үчүгэй нэһилиэгэр төрүт омук — эбээннэр түөлбэлээн олороллорун быһыытынан Национальнай нэһилиэк статуһун ыларын туруорсуу буолла.
Хомойуох иһин, биир тыын боппуруос – сибээс туһунан Өймөкөөн нэһилиэгин олохтоохторо туруорсан истэхтэринэ, интэриниэт баран хаалан, тыа сирин олохтоохторо отчуоту салгыы истибэтилэр. Улуус биир бөдөҥ нэһилиэгэ – Томтор эмиэ сибээс суоҕуттан отчуокка кыттыбата.
Дьиҥэр олохтоохтор бары куттанар төрүөттэрэ ити этэ – отчуот үгэннээн турар кэмигэр уот баран хаалыа эбэтэр интэриниэт сүтүө диэн.
Өймөкөөн улууһа 100% оптоволокноҕа холбонон, улуус олохтоохторо сибээс үчүгэй кэмигэр куораттыы олороллор. Ол эрээри улуус киинигэр сибээс быстар куһаҕаннык үлэлиирэ, бастаан киирэн баран үчүгэйдик үлэлээн иһэн, аны нэһилиэктэргэ эмиэ ВОЛС лиинийэтэ сүтэрэ – кыһалҕаны үөскэтэр буолла.
Сибээс быстан хаалбытынан сибээстээн, улуустааҕы «Северная заря» хаһыат кэрэспэдьиэнэ Юлия Фролова улуус дьаһалтатыгар тиийэн, баһылык Иннокентий Сивцевтэн анаан кэмэнтээрий ылла.
— Бүгүҥҥү куйаар ситиминэн буолбут ситэриилээх былаас отчуота биһиги уталыппакка быһаарыахтаах сүрүн кыһалҕабытын арыйда. Өймөкөөн улууһугар сибээс — тыын боппуруос буоларын бүгүҥҥү тэрээһин көрдөрдө. Бүгүн Томпо улууһугар «Теплай Ключка» кабель быһа баран, ВОЛС сибээһэ баран хаалан, улуус нэһилиэктэрин олохтоохторо отчуоту аҥарыттан истибэтилэр. Оттон улуус киинин уонна Аартык бөһүөлэгин олохтоохторо Дьокуускайтан кэлэр сибээс быстааатын кытта, Магадантан ситимнээх иккис «резервнэй» дэнэр лиинийэҕэ холбонон, отчуоту салгыы иһиттилэр. Онон быйылгы сылга сүрүн сорук — нэһилиэктэри Магадаантан кэлэр иккис «резервнэй» лиинийэҕэ холбооһун.
Сүрүннээн бары суолталаах боппуруостары сибээс быстыан иннинэ улуус киинин, Аартык бөһүөлэгин уонна нэһилиэктэр олохтоохторо «үспүөйдээн» хото быһаарыстылар, тустаах министиэристибэлэр эппиэттээх салайааччыларын хоруйдарын иһиттилэр.
Бары быһаарыыга наадыйар боппуруостары улуус дьаһалтата эрдэттэн хомуйбут буолан, министиэристибэлэргэ тиэрпитэ. Онон бүгүҥҥү ситэриилээх былаас отчуотун боротокуолугар ол боппуруостар бары киириэхтэрэ уонна онно туһааннаах министиэристибэлэр хоруйдара сырдатыллыаҕа, — диэн бэлиэтээтэ улуус баһылыга Иннокентий Сивцев.
Елена ПОТОЦКАЯ, «Саха сирэ» хаһыат.
Хаартыска — Юлия Фролова.