Бу күннэргэ СӨ Үүнэр көлүөнэ тус сыаллаах пуондатын үлэһиттэрэ доброволец быһыытынан Чурапчы улууһун Мугудай сэлиэнньэтин таһыгар үлэлээтилэр. Кинилэр уоту утары охсуһууга атырдьах ыйын 16 күнүгэр Саха Өрөспүүбүлүкэтиттэн Баайы-дуолу бас билиигэ уонна сир сыһыаннаһыытыгар министиэристибэ хомуур этэрээтин кытта тахсыбыттара.
— Биһиги уот тарҕаныыта үгэннээн турар кэмигэр тиийбиппит, бу диэки модун күүс хомуллубут этэ – ЫБММ үлэһиттэрэ, Авиалесоохрана, «Якутлесресурс» уонна да атын тэрилтэлэр, араас тиэхиньикэ баһаарга үлэлии сылдьаллар этэ. Биһиги 41 км усталаах минерализованнай балаһаны оҥорууга үлэлээбиппит, утары уоту ыыттыыга кыттыспыппыт, уот кыра күөдьүйүүлэрин умулларбыппыт. Олохтоох дьаһалта, тэрилтэлэр эмиэ көхтөөхтүк үлэлэспиттэрэ, Мугудай дьахталлара аһыыр сири тэрийбиттэрэ, өйүө ас түҥэппиттэрэ. Бу курдук дьон сомоҕолоһоро баһаардары сотору кэминэн кыайыахпыт диэн эрэли үөскэтэр, — диэн пуонда персоналы кытта үлэтин салалтатын салайааччыта Иннокентий Марков санаатын үллэһиннэ.
Бэлиэтээн эттэххэ, СӨ Үүнэр көлүөнэ тус сыаллаах пуондата бу күннэргэ Бэс Күөлгэ умайбыт дьиэлэри тутуу үбүлээһининэн дьарыктанар. 200 мөлүйүөн солкуобайы «АЛРОСА» хампаанньа биэрбитэ. Атырдьах ыйын 19 күнүгэр Саха сирин Ил Дархана Айсен Николаев сөргүтүү үлэтин саҕаланыытын биллэрэн, маҥнайгы дьиэ акылаата түспүтэ. Пуонда бэдэрээтчиттэри уонна оллохтоохтору кытта дуогабар түһэрсии үлэтин билигин даҕаны ыытар. Тутуу матырыйаалларын тиксэрии үлэтэ суһал тэтиминэн оҥоһулла турар.
«Саха сирэ» хаһыат, edersaas.ru
Хаартыска sakha.gov.ru