Сайтпытыгар 2018 сыл сэтинньи 22 күнүгэр «Иннокентий Макаровы өлөрүөхсүккэ суут бириигэбэрэ таҕыста» диэн матырыйаалым бэчээттэммитэ. Онно Дьокуускай куорат федеральнай суута өлөрүөхсүт Вячеслав Степановка уураах таһаарбытын туһунан суруллубута. Бириигэбэргэ сөпсөспөккө, өрүттэр СӨ Үрдүкү суутугар ааһыммыттара.
Санатан эттэххэ, Дьокуускай куорат суута Владислав Степановы киһини соруйан өлөрүүгэ буруйдааҕынан билинэн, 9 сылга кытаанах эрэсиимнээх холуонньаҕа көҥүлүн быһарга итиэннэ эмсэҕэлээччилэргэ 2 мөл. солк. моральнай хоромньуну төлүүргэ уурбута.
Оттон өлүгү кистээһиҥҥэ көмөлөспүт Острелины РФ Холуобунай кодексатын 316-с ыстатыйатынан буруйдааҕынан билинэн, 180 тыһ. солк. суумалаах ыстараап төлүүргэ уурбута.
СӨ Үрдүкү суутун пресс-сулууспата иһитиннэрбитинэн, бүгүн, олунньу 12 күнүгэр, СӨ Үрдүкү суутугар эмсэҕэлээччилэр ааһынар дьыалалара көрүллүбүтүн түмүгэр, Степановка накаастабылын болдьоҕор биир сыл эбиллибит, ол эбэтэр, 10 сылга көҥүлэ быһыллыбыт. Онтон атына оннунан хаалбыт.
Вера МАКАРОВА, «Саха сирэ» хаһыат, edersaas.ru
Ааптар хаартыскаҕа түһэриитэ