Быйыл олохтоох киинэ индустриятын сайыннарыыга 80 мөлүйүөн солкуобайы көрүөхтэрэ.
Бу туһунан тустаах министиэристибэлэр салайааччылара Ил Дархан Айсен Николаевка буолбут мунньахха иһитиннэрдилэр. Култуура уонна духуобунай сайдыы миниистирэ Юрий Куприянов бэлиэтээбитинэн, саха киинэтин устууну өйүөхтэрэ, омук киинэлэрин оннугар Арассыыйа уонна саха киинэлэрин хото көрдөрүөхтэрэ.
РФ судаарыстыбаннай бириэмийэтин лауреата, СӨ үтүөлээх артыыһа, киинэ актера уонна продюсера Иннокентий Луковцев саха киинэтин сайыннарыыга туһуламмыт өйөбүл туһунан санаатын маннык үллэһиннэ:
— Көрөөччү сэҥээриитин ылбыт үс киинэни уһуллум: “Кэрэл” (2015 сыллаахха Валентин Макаровы уонна Илья Портнягины кытта устубуппут), “Тиэтэйбит” (2020 сыллаахха уһуллубута) уонна быйыл бэс ыйын 2 күнүгэр көрөөччү дьүүлүгэр тахсаары турар “Дьулуур” диэн мас тардыһыытыгар анаммыт уус-уран киинэ. Сааҥсыйа биллэриллэн, кырдьык, киинэни көрөөччү аҕыйаата. Голливуд уонна омук киинэлэригэр көрөөччү 70%-на сылдьар этэ. Саха киинэтин муҥутаан 40-50 тыһыынча киһи көрөр. Ол эбэтэр — көрөөччү 10%-на.
Биир бэйэм икки киинэбин устууга өйөбүлүнэн туһамматаҕым. Иккиэннэрин бэйэбит үппүтүнэн уһулбуппут. Үһүс киинэбин Арассыыйа гранын ылан уһулбутум. Өскөтүн сыл аайы 80 мөлүйүөн өйөбүл оҥоһулуннаҕына, холобурдаан эттэххэ, 8 киинэ уһуллуон сөп. Саха киинэтин маннык өйүүр буолбуттара үс сыл буолла. Онон кэлиҥҥи кэмҥэ элбэх киинэ таҕыста. Бу курдук өйөбүл баара үчүгэй, элбэх киинэ уһулларыгар олук уурар.
Елена ПОТОЦКАЯ, “Саха сирэ” хаһыат.