Маны аах Үөрэх уонна наука

“Инникигэ хардыы” кэмпириэнсийэ үөрэххэ киирэргэ баал эбэр

Академик В.П. Ларионов аатынан өрөспүүбүлүкэтээҕи “Инникигэ хардыы” научнай-практическай кэмпириэнсийэ XXVI ыытылла турар. Быйылгы тэрээһин кэккэ уларыйыылардаах. Олортон биирдэстэринэн кэмпириэнсийэҕэ ситиһии иһин үөрэххэ туттарсарга баал эбиллэр.

“Быйыл “Инникигэ хардыы” научнай-практическай кэмпириэнсийэ РФ Үөрэҕириигэ министиэристибэтин тэрээһиннэрин испииһэгэр киирэн, оскуоланы бүтэрэр оҕолор үөрэххэ туттарсалларыгар тус ситиһии быһыытынан ааҕыллан, баал эбиллэр буолла. Хас биирдии үрдүк үөрэх тэрилтэтин быраабылатыгар хас баал эбиллэрэ ыйыллар. Ол эрээри, тус ситиһии иһин саамай үрдээбитэ 10 баал ааҕыллар. Научнай-практическай кэмпириэнсийэ хас баалы эбэрин, туттарсар университеттарын саайтыгар киирэн чопчу көрүөхтэрин сөп”, — диэн кэмпириэнсийэ тэрийээччитэ, ХИФУ анал үөрэтэр-научнай киинин дириэктэрэ Милана Федотова быһаарда.

Кэмпириэнсийэ кыайыылаахтарыгар М.К. Аммосов аатынан Хотугулуу-Илиҥҥи федеральнай университекка туттарсааччыларга төһө баал эбиллэрин киин тутар хамыыһыйаттан туоһуластыбыт. Тустаах үөрэх тэрилтэтигэр туттарсааччыларга өрөспүүбүлүкэтээҕи “Инникигэ хардыы” научнай-практическай кэмпириэнсийэ кыайыылааҕар 5 баал, призеругар 3 баал диэн чопчулаатылар. Оттон үөрэххэ куонкурустарга биир даҕаны баал баҕалаах. Онон быйылгы абитуриеннарга бу биир үчүгэй сонун диэххэ сөп.

 

Людмила ПОПОВА, “Саха сирэ” хаһыат, edersaas.ru

Хаартыска: tetrika-school.ru

0
0
Telegram @edersaas20