Математиканы уонна информатиканы оскуолаҕа үөрэтии тупсарыллыахтаах диэн дойду бэрэсидьиэнэ Владимир Путин сорудаҕар ыйбыт. Сорудах 2021 сыл балаҕан ыйын 1 күнүгэр диэри туолуохтаах.
Аҕыйах хонуктааҕыта тахсыбыт дойду бэрэсидьиэнин сорудаҕын испииһэгэр оскуолаҕа математиканы уонна информатиканы үөрэтии тупсарыллыахтаах, онтон үрдүк үөрэх бырагыраамата искусственнай интеллект технологиятын үөрэтиинэн ситэриллиэхтээх диэн ыйбытын, сонуну киэҥник тарҕатар киин ситимнэр суруйаллар.
“Үөрэх былааныгар ордук болҕомтону ууран уонна уопсай үөрэхтээһин сүрүн бырагырааматын барыллаан ис тутулун көннөрөн, оскуолаларга математика уонна информатика биридимиэттэрин үөрэтиини тупсарыыны хааччыйарга”, — диэн докумуоҥҥа суруллубут. Ону тэҥэ: “Үлэ бары эйгэтигэр искусственнай интеллегы туһанар инниттэн, үрдүк үөрэх бырагыраамаларын бары исписээлинэстэригэр уонна хайысхаларыгар бэлэмнээһиҥҥэ искусственнай интеллект технологиятын үөрэтии салааларын киллэрэргэ”, — диэн ыйыллыбыт.
Оччотугар, аны күһүҥҥүттэн үөрэх бырагырааматыгар тустаах биридимиэттэргэ болҕомто өссө күүһүрэрэ сэрэйиллэр. Ону кытта искусственнай интеллеккэ сыһыаннаах идэлэргэ бүддьүөт миэстэтэ эбиллиэ диэн сабаҕалыыллар. Ол эрээри, омук тылын биридимиэтин булгуччулаах эксээмэннэр кэккэлэригэр киллэрбэтэхтэрэ өйдөммөт. Дьиҥэр, искусственнай интеллект уонна омук тыла сэргэстэһэ сылдьыахтарын сөп этэ.
Людмила ПОПОВА, “Саха сирэ” хаһыат, edersaas.ru
Хаартыска: iStock