Инклюзивнай тыйаатыр “Көмүс мааскаҕа” кыттар

Бөлөххө киир:

«Маленький принц» инклюзивнай тыйаатыр Москваҕа «Пасхальный дар» аһымал бэстибээлгэ кытта сылдьар. Бу уулуссаҕа буолар «Золотая маска» в городе» бэстибээл чэрчитинэн ыытыллар. 

Инклюзивнай тыйаатыр муус устар 8 күнүгэр аһаҕас халлаан анныгар, Тверской болуоссакка “Алгыс” диэн испэктээкили көрдөрбүт. Салгыы муус устар 10,11 күннэригэр Өрөбөлүүссүйэ болуоссатыгар испэктээкиллэрин көрдөрүөхтэрэ.

«Маленький принц» инклюзивнай тыйаатыр «Харысхал» аһымал пуондатын уонна П.А. Ойуунускай аатынан Саха академическай тыйаатырын иһинэн тэриллибитэ. Манна доруобуйаларыгар хааччахтаах оҕолор эмиэ дьарыктаналлар. Саха тыйаатырын артыыстарын кытта бииргэ сыанаҕа оонньуулларын таһынан, бары ыллыыллар, үҥкүүлүүллэр. Аҕыйах сыл иһигэр хас да музыкальнай испэктээкили туруоран, көрөөччү биһирэбилин ылбыттара. Ол курдук, Антуан де Сент-Экзюпери «Маленький Принц», Льюис Кэрролл «Алиса в стране чудес» айымньыларынан испэктээкиллэри туруорбуттара. Уратыта диэн, оҕолор бэйэлэрэ эмиэ режиссураҕа, сценарийын суруйууга кыттыһаллар.

Кыракый артыыстар Москваҕа баралларын туһунан истэн баран, олус үөрбүттэрэ, долгуйбуттара. Эрдэттэн кичэйэн бэлэмнэммиттэрэ. Кинилэргэ дойду киин куоратын илэ көрүү, атын эйгэҕэ тиийэн бэйэлэрин айар үлэлэрин көрдөрүү улахан суолталаах түгэн. Тыйаатыр салайааччылара Ольга Захарова уонна Елена Гримм этэллэринэн, испэктээкил көрөөччүнү элбэххэ үөрэтэр, толкуйдатар.

«Пасхальный дар» бэстибээл көрөөччүлэргэ 24 инклюзивнай испэктээкили бэлэхтиэҕэ. Санкт-Петербург, Томскай, Череповец, Аллараа Новгород уонна Дьокуускай тыйаатырдара кытталлар.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0