ГИМС иниспиэктэрдэрэ Дьокуускайга сынньанааччыларга сэрэтэр, өйдөтөр бэсиэдэлэри оҥордулар.
Дьокуускайга куйаас күннэр сатыылаабыттарынан, дьон-сэргэ куоракка көҥүллэнэ илик пляжтарга сынньана тахсара элбээтэ. Маннык сирдэргэ сөтүөлүүр кутталлаах диэн РФ ЫБММ Саха сиринээҕи управлениетын пресс-сулууспата иһитиннэрэр.
Маннык сирдэртэн биирдэстэринэн Дьокуускай куорат 202 түөлбэтигэр баар пляж буолар. ГИМС иниспиэктэрдэрэ СӨ быыһааччылар сулууспаларын, ПДН органнарын бэрэстэбиитэллэрин кытта дьоҥҥо өйдөтөр, сэрэтэр бэсиэдэлэри оҥордулар. Тэрээһин сыллата ыытыллар «Вода безопасная территория» аахсыйа иитинэн ыытылынна.
«Дьон-сэргэ сэрэхтээх буоларыгар, оҕолорун көрө-истэ сылдьалларыгар бэсиэдэлэри оҥордубут. Маны сэргэ, пляжка көрүүтэ-истиитэ суох сылдьар оҕолору буламмыт кэпсэттибит, төрөппүттэригэр төлөпүөнүнэн эрийэн оҕолорун көрө-истэ сылдьалларыгар сүбэлээтибит», — диэн дьоҕус суудуналарга ыстаарсай иниспиэктэр, РФ ЫБММ Саха сиринээҕи салаатын ГИМС 1 №-дээх отделениетын салайар Виталий Осипов иһитиннэрдэ.
Бэлиэтээн эттэххэ, өрөспүүбүлүкэҕэ биир да пляж бүгүҥҥү күҥҥэ көҥүллэнэ илик, итиннэ 202 микрооройуон сөтүөлүүр сирэ эмиэ киирэр.
Манна эбэн эттэххэ, Роспотребнадзор Саха сиринээҕи управлениетын иһитиннэриитинэн (22.06.2021 туругунан) куоракка сөтүөлүүр сир лабораторнай чинчийиилэр түмүктэринэн уута кирдээх, кумаҕа гигиеническэй ирдэбилгэ эппиэттиир. Пляжка уу хаачыстыбатын хат чинчийэллэр. Бүгүҥҥү күҥҥэ сөтүөлүүр сири арыйарга көҥүллүүр докумуоннар бэриллэ иликтэр.
«Сөтүөлүүргэ көҥүллэмэтэх сирдэргэ куттал суох буолуутун уонна оҕолоргутугар куттал суох буолуутун ким да мэктиэлиир кыаҕа суох. Быһылааны, түбэлтэни көрдөххүтүнэ түргэнник суһал сулууспаҕа «112» нүөмэргэ эрийэн биллэриҥ», — диэн РФ ЫБММ Саха сиринээҕи управлениета иһитиннэрэр.
+1
+1
+1
+1
+1
+1
+1