Өрөспүүбүлүкэҕэ инфекционнай куойка ахсаанын 2808-ка диэри элбэттилэр. Ол иһигэр Дьокуускайга – 1358 куойка баар.
Доруобуйа харыстабылын миниистирэ Елена Борисова өрөспүүбүлүкэтээҕи суһал ыстаап мунньаҕар иһитиннэрбитинэн, бу куойкалар 67,8% (Дьокуускайга – 87,7%) туолан тураллар.
Суһал ыстаап салайааччытын солбуйааччы Ольга Балабкина лабораториялар күүскэ үлэлээннэр, бу күннэргэ коронавируска анаалыһы туттарарга уһун уочарат сүттэ диэн эттэ. Ол курдук, киин куоракка анаалыс түмүгүн кэтэһии 3-4 күнтэн уһаабат. Ону тэҥэ, улуустарга эмиэ миэстэтигэр ылар, түмүгү таһаарар курдук үлэ тэриллэр.
Санатар буоллахха, алтынньы 31 күнүнээҕи туругунан Саха сиригэр барыта 13 661 киһи коронавируһунан ыалдьыбыт. Бүгүн 192 киһи эбиллибит. Суукка иһигэр 93 киһи үтүөрэн, ыарыыны кыайбыт ахсаана барыта 8590 киһиэхэ тэҥнэспит. 134 киһи тыына быстыбыт.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн