Арассыыйаҕа ааспыт хонукка 24 150 киһи коронавирустаабыта биллибит (сэтинньи ыйтан маҥнайгытын 25 тыһ. аҕыйах). Дойдуга барыта 3,2 мөлүйүөн киһи коронавирус дьаҥар сутуллубута биллэр. Олортон 58 506 киһи өрүттүбэтэх (ааспыт сууккаҕа 504 киһи). 2,6 мөл. ыалдьыбыт дьон хамсык саҕаланыаҕыттан үтүөрбүттэр (ааспыт сууккаҕа 19,8 тыһ. киһи).
— Ыарыы эмискэ намтааһына, коронавирус тарҕаныыта намтаан эрэрин сибикитэ буолбатах. Саҥа дьыллааҕы бырааһынньыктар кэмнэригэр тестэри оҥоруу ахсаана аҕыйаабытынан эрэ, кэммиэрчэскэй лабораториялар үлэлэрин тохтоттулар. Ону таһынан, ыалдьыбыт дьон өрөбүллэр кэмнэригэр балыыһаҕа бара сатаабаттар, — диэн «Лидер-Медицина» мэдиссиинэ киинин кылаабынай бырааһа, инфекционист Евгений Тимаков быһааран этэр. Кини этэринэн, Арассыыйа ыарыы муҥутуур чыпчаалын ааһа илик, COVID-19 өссө даҕаны бэринэрэ ыраах.
Хаартыскаҕа Сергей Ведяшкин түһэриитэ. / АГН «Москва»
«Саха сирэ» хаһыат, edersaas.ru