Кырдьаҕас, ыарыһах дьон бииргэ түмсэн олороллоро билиҥҥи кэмҥэ кутталы үөскэтиэн сөп. Онон кырдьаҕастар, инбэлииттэр интэринээт-дьиэлэригэр олорор дьону биирдиилээн ыалларга олордо сатыыллар. Атырдьах ыйын 20 күнүгэр буолбут СӨ бырабыыталыстыбатын мунньаҕар кырдьаҕастары ылан иитэр дьиэ кэргэттэр тустарынан сокуоҥҥа уларытыылары киллэрдилэр.
edersaas.ru
Үлэ, социальнай сайдыы миниистирэ Елена Волкова 1-кы, 2-с группалаах инбэлииттэри дьиэ кэргэттэр көрө-истэ ылалларыгар усулуобуйа оҥорор туһунан этии киллэрдэ.
Өрөспүүбүлүкэҕэ сааһырбыт дьону дьиэ кэргэттэр көрө-истэ ылар уопуттара сэҥээриини ылбыта. Бастатан туран, саастаах киһи төрөөбүт дойдутуттан тэйбэккэ, кэлбэккэ-барбакка, билэр дьонугар дьиэ кэргэн чилиэнэ буолан олороро быдан ордук. Иккиһинэн, ыал оҕолоро эбээлэнэн, эһээлэнэн хаалаллар, судаарыстыба ый аайы 20,7 тыһыынча солкуобайы төлүүр, ону тэҥэ, биэнсийэтиттэн эмиэ биэрэр. Үсүһүнэн, судаарыстыба интэринээт-дьиэлэргэ уочараты аҕыйатар, биир киһини көрүү-истии ороскуотун кыччатар. Онон эргиччи туһалаах дьыала.
Билиҥҥи туругунан, өрөспүүбүлүкэҕэ 208 ыал кырдьаҕаһы дьиэҕэ ылан көрөр-истэр.
Оттон бу сокуон инбэлииттэри дьиэ кэргэҥҥэ көрөрү-истэри көҥүллүүр. Елена Волкова этэринэн, бу уларытыы эбии үбү-харчыны эрэйбэт, тоҕо диэтэр, анал бырагыраама номнуо үлэлии турар. Холобур, 2020 сылга бу бырагыраамаҕа 92 мөлүйүөн солкуобай көрүллүбүт.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.