Инбэлииттэргэ үлэ миэстэтин хааччыйар тэрилтэлэргэ субсидия көрүллүөҕэ
СӨ Бырабыыталыстыбатын мунньаҕар, уопсайа, 16 боппуруос көрүллүбүтүттэн, үһүн СӨ Нэһилиэнньэ үлэлээх буолууга судаарыстыбаннай кэмитиэтэ киллэрдэ. Ол курдук, таба ыстаадаларыгар сайыҥҥы кэмҥэ оҕону үлэнэн хааччыйыыга субсидия туһунан саайтпытыгар сырдаппыппыт. Бүгүн инбэлииттэри үлэнэн хааччыйыыга көрүллүбүт икки боппуруоһу быһаарыахпыт.
edersaas.ru
СӨ Нэһилиэнньэ үлэлээх буолууга судаарыстыбаннай кэмитиэтин бэрэссэдээтэлин солбуйааччы Гаврил Харлампьев иһитиннэрбитинэн, Саха сиригэр 24 397 үлэлиир кыахтаах инбэлиит баарыттан 6 824 тыһыынчата үлэлиир эбит. Ол эбэтэр, 27,9 % бырыһыаҥҥа тэҥнэһэр диир. Сыллата дьарыктаах буолуу киинигэр 1300 инбэлиит кэлэн ааһар эбит, итинтэн 40-ча % үлэҕэ киирэр үһү.
СӨ Ил Дархана былырыыҥҥы ыйааҕар олоҕуран, 2024 сылга диэри үлэлиир инбэлиит ахсаанын 50 бырыһыаҥҥа диэри тиэрдиэхтээхтэр. Дьэ, ол иһин араас миэрэлэри толкуйдууллар.
Мунньахха инбэлииттэргэ сыһыаннаах көрүллүбүт боппуруостан бастакыта – үөрэхтэрин саҥа бүтэрбит, уопута суох эдэр инбэлииттэри (18-44 саастаахтар) үлэнэн хааччыйыыга субсидия көрүү. Ол курдук, үлэ биэрээччини көҕүлүүр инниттэн, түөрт ый устата өрөспүүбүлүкэ хааһынатыттан инбэлиит хамнаһын (хамнас алын кээмэйиттэн ордуга суох) уонна үлэҕэ саҥа киирбит эдэр инбэлииккэ сүбэлиир-амалыыр, хайдах үлэлииргэ үөрэтэр наставник ананнаҕына киниэхэ хамнаһыгар эбиликкэ субсидия көрүллүүтүн туһунан боппуруоһу көрдүлэр. Ол эрээри, бу Саха сиригэр саҥа киирэр толкуй буолан, үгүс ыйытыылардаах буолан биэрдэ. Онон мунньах кыттыылаахтара ситэрэргэ диэн эттилэр.
Иккис боппуруос — судаарыстыбаннайа суох юридическай сирэйдэр, урбаанньыттар доруобуйатынан хааччахтаах дьону үлэҕэ ылалларыгар көрсүбүт ороскуоттарыгар субсидия. Судургутук быһаардахха, доруобуйатынан хааччахтаах дьон үлэлиир миэстэтигэр кэккэ ирдэбиллэр бааллар. Холобура, дьүлэй, опорнай-двигательнай аппараттара, харахтара мөлтөх дьон үлэлиир миэстэлэрэ чопчу маннык буолуохтаах диэн ыйыллар. Ону толорорго тэрилтэ көрсүбүт ороскуотун сорҕотун сабынарыгар өрөспүүбүлүкэ хааһынатыттан субсидия көрүөхтэрэ. Итинник субсидияны ылбыт тэрилтэ Дьарыктаах буолуу судаарыстыбаннай кэмитиэтин кытта сөбүлэһиигэ илии баттаһан, үс сыл устата бу үлэ миэстэтин сүтэриэ суохтаах диэн этиллэр. Холобура, инбэлиит бэйэтэ доруобуйатынан уурайар түгэнигэр, Дьарыктаах буолуу киинэ ол киһи оннугар атын киһини ыытыахтаах. Тустаах боппуруоһу бэҕэһээ бигэргэттилэр.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.