Ыам ыйын 5 күнүгэр Инбэлииттэр бырааптарын иһин охсуһуу аан дойдутааҕы күнэ бэлиэтэнэр. Аан бастаан 1992 сыллаахха доруобуйаларыгар хааччахтаах дьон Европа 17 дойдутугар инбэлииттэр бырааптарын иһин туруулаһан, анал аахсыйаны ыыппыттара.
Инклюзивнай бэстибээл кэмигэр.
Доруобуйа харыстабылын аан дойдутааҕы тэрилтэтин (ВОЗ) дааннайдарынан, аан дойдуга 1 миллиартан тахса киһи (аан дойду нэһилиэнньэтин 15%-на) доруобуйаларыгар хааччахтаахтар (инбэлиит буолуу ханнык эрэ көрүҥүнэн). Ол иһигэр, 100 мөлүйүөнтэн тахса инбэлиит оҕо баар.
Арассыыйаҕа доруобуйаларыгар хааччахтаах дьоҥҥо көмөлөһөр сыаллаах кэккэ судаарыстыбаннай бырагыраамалар үлэлииллэр. Инбэлииттэр үөрэнэллэригэр табыгастаах буолууга уонна хаачыстыбаны үрдэтиигэ үөрэҕирии эйгэтигэр судаарыстыбаннай бэлиитикэ үлэлиир. 2011 сылтан үөрэх тэрилтэлэригэр киирэргэ-тахсарга хааччахтаммакка сылдьыы усулуобуйата тэриллэр, инклюзивнай үөрэхтээһин сайдар.
Саха сиригэр инклюзивнай үөрэхтээһин нэдиэлэлэрэ, бэстибээллэр, араас тэрээһиннэр, аахсыйалар, спортивнай күрэхтэһиилэр ыытыллаллар, аһымал пуондалар таһаарыылаахтык үлэлииллэр.
Ангелина Васильева, “Саха сирэ” хаһыат, edersaas.ru
Хаартыска: dobrosakha.ru