Инбэлиит уонна доруобуйаларынан хааччахтаах оҕолор спартакиадалара буолла
Бу күннэргэ Дьокуускайга доруобуйаларынан хаччахтаах уонна инбэлиит оҕолор ортолоругар XV спартакиада буолан ааста.
Тэрээһин сүрүн соруга — инбэлиит уонна доруобуйаларынан хааччахтаах оҕолору физическэй култуураҕа сыһыаран, кинилэр доруобуйаларын бөҕөргөтүү, спорт араас көрүҥнэригэр дьарыктаныыга угуйуу, тарҕатыы. Үтүө үгэс быһыытынан тэриллэр спартакиада оҕолорго бырааһынньык тыынын бэлэхтиир буолан, бу тэрээһин кыттыылаахтара бэйэлэрин тэҥнээхтэрин кытта күрэстэһэргэ баҕаларын күүһүрдэр, кыахтарын тэҥнээн көрөн, спордунан утумнаахтык дьарыктанарга көҕүлүүр. Маннык тэрээһиннээх күрэхтэһиилэртэн тэрийээччилэр өрөспүүбүлүкэ паралимпийскай резервэтин сүүмэрдииллэр.
Өрөспүүбүлүкэтээҕи күрэхтэһиигэ зоналарынан ыытыллыбыт сүүмэрдиир тэрээһиннэртэн талыллан, «Дохсун» футболлуур манежка уонна «Самородок» спортивнай комплекска 46 оҕо кыттыыны ылла. Мандатнай хамыыһыйа Таатта, Мэҥэ Хаҥалас улуустарын уонна Дьокуускай куорат коррекционнай интернат-оскуолаларыттан көрбөт уонна истибэт, хамсанар кыахтара хааччахтаммыт оҕолору спорт көрүҥнэринэн сүүмэрдээн кытыннарда.
Оҕолор остуол тенниһигэр, чэпчэки атлетикаҕа, сытан эрэ штанганы көтөҕүүгэ, дартска, пауэрлифтиҥҥа уонна дуобакка күрэхтэстилэр.
Хамсанар кыахтара хааччахтаммыт оҕолорго Дьокуускай куораттан Света Ворнявская РФ спордун маастарын нуорматын толорон, муҥутуур чөмпүйүөнүнэн буолла. Кини аата дорҕоонноохтук ааттанна. Күрэхтэһии бары көрүҥнэригэр 34 №-дээх анал коррекционнай оскуола оҕолоро күүстээхтэрэ көһүннэ.
— СӨ Оҕо спордун уонна спортивнай резервэни бэлэмнээһин управлениетын салайааччытыгар Василий Егоровка, өрөспүүбүлүкэтээҕи адаптивнай физическэй култуура киинин, физическэй култуура уонна маассабай спорт управлениетын, өрөспүүбүлүкэтээҕи дуобат-саахымат киинин салайааччыларыгар, Дьокуускай куорат коррекционнай оскуолаларын дириэктэрдэригэр инбэлиит уонна доруобуйаларынан хааччахтаах оҕолору физическэй култуураҕа сыһыарыыга улахан өйөбүлү оҥорор регионнааҕы XV спартакиаданы ыытыыга өйөбүллэрин иһин барҕа махталбытын тиэрдэбит. Оҕо спордун сайыннарыыга, ыччаппыт доруобуйатын бөҕөргөтүүгэ бу курдук бары бүттүүн бэйэ-бэйэбитин өйүү, көмөлөһө сырыттахпытына, улахан хамсааһын тахсар, — диэн бэлиэтиир Ил Түмэн дьокутаата, оҕо уонна ыччат физическэй култуураҕа уонна спортка сайдыытын киинин дириэктэрэ Михаил Габышев.
Регионнааҕы XV спартакиадаттан кыайыы көтөллөммүт оҕолор барахсаттар бу тэрээһинтэн санаалара көтөҕүллэн, саҥаттан саҥа кыайыыны ситиһэр баҕалаах тарҕастылар.
Елена ПОТОЦКАЯ, «Саха сирэ» хаһыат, edersaas.ru