Маны аах Уопсастыба

Инбэлиит оҕолорго кэлим чинчийии ыытыллар

Саха сиригэр Национальнай социальнай көҕүлээһин чэрчитинэн, доруобуйаларыгар хааччахтаах уонна инбэлиит оҕолор доруобуйаларын кэлим чинчийиини (диагностика) ыытар бырайыак үлэлээн саҕалаата.

Бырайыагы СӨ үлэҕэ, социальнай сайдыыга министиэристибэтэ үлэлэтэр. “Пилотнай” тэрилтэ быһыытынан Дьокуускайга баар Доруобуйаларыгар хааччахтаах оҕолору реабилитациялыыр өрөспүүбүлүкэтээҕи киин талыллыбыта. Бырайыагы үлэлэтэргэ Стратегическай көҕүлээһин ааҕыныстыбата уонна “Росатом” корпорация көмөлөһөллөр.
2022 сыл кулун тутар ыйыттан инбэлиит оҕолор доруобуйаларын кэлим чинчийии болдьоммут кэмҥэ биир сиргэ ыытыллар. Манна психолог, невролог, ЛФК бырааһа, физиотерапевт, логопед-дефектолог уонна социальнай үлэҕэ исписэлиис биир хамаанда быһыытынан үлэлииллэр. Чинчийии түмүгүнэн оҕо доруобуйатын чөлгө түһэриигэ, эмтэниигэ тустаах каарта (маршрут) оҥоһуллар.
Кииҥҥэ оҕолору саастарынан уонна араас ыарыыларынан арааран, реабилитационнай бырагыраамалар үлэлииллэр. Манна көрөллөрүгэр, истэллэригэр, саҥаралларыгар, хамсаналларыгар, ньиэрбэлэригэр, мэйиилэригэр, о.д.а. кэһиллиилээх оҕолорго анаммыт бырагыраамалар бааллар.
Ону тэҥэ, реабилитациялыыр кууруһу ааспыт инбэлиит оҕолорго анаан, дьиэлэригэр олорон дьарыктаналларыгар аналлаах тэйиччиттэн бырагыраамалар эмиэ үлэлииллэр. Бу дьарыгы бырахпакка, күн аайы дьарыктаныы инбэлиит оҕо доруобуйатыгар улахан суолталаах.
Бу саҥаны киллэриини төрөппүттэр номнуо биһирээтилэр.


— Биһиги бу кииҥҥэ төрдүс төгүлүн кэлэн эмтэнэбит. Бу сырыыга кэлим чинчийии киирбититтэн соһуйдубут да, астынныбыт да. Урут хас быраас ахсын туспа уочараттыыр этибит. Холобур, педиатр кэнниттэн неврологка туспа, ЛФК-ҕа туспа уочараттаан, бириэмэбитин ыытарбыт. Билигин барыта биир кэмҥэ, биир сиргэ көрөллөрө, эмтииллэрэ олус табыгастаах буолбут. Бастакы күммүтүгэр хойут кэлбит буолан, эрдэ утуйбуппут. Сарсыныгар эрдэттэн кэлэн, биир бастакынан, бэрт түргэнник чинчийиини аастыбыт, онон олус астынныбыт, — диэн кэпсиир Кэбээйи сэлиэнньэтиттэн кэлбит Зинаида Неустроева.


Пандемия буолуон иннинэ биһиги бу кииҥҥэ иккитэ сылдьыбыппыт. Бу сырыыга элбэх үчүгэй уларыйыылар буолбуттарын бэлиэтии көрдүбүт. Саамай сүрүнэ, киирбит күммүтүгэр бэрт түргэнник кэлим чинчийиини аастыбыт, тута эмтэнэр маршрутнай лииспитин туттарбыттара. Хас сырыы аайы кииҥҥэ үчүгэй өттүгэр уларыйыы, сайдыы баран, үлэтэ тупсан иһэриттэн үөрэбит, бары үлэһиттэригэр махталбытын тиэрдэбит, – диэн Таатта улууһун Боробулуттан икки оҕотун кытары кэлбит Елизавета Стручкова үөрэ-көтө санаатын үллэстэр.
Манна даҕатан эттэххэ, реабилитациялыыр кииҥҥэ кэлим чинчийиини барарга инбэлиит оҕолоох төрөппүттэр олорор сирдэриттэн социальнай көмүскэл управлениетыттан анатан кэлэллэр.

Ангелина Васильева, «Саха сирэ» хаһыат, edersaas.ru

Хаартыска: sakhagov.ru

0
0
Telegram Whatsapp