4-тэн үөһээ саастаах инбэлиит оҕолору балыыһаҕа төрөппүттэрин кытары босхо сытыаран эмтиири көҥүллүүр туһунан сокуон барыла РФ Судаарыстыбаннай дууматыгар бастакы ааҕыыга ылылынна.
«Сокуон барыла ылылыннар эрэ, сүүһүнэн тыһыынча кыра оҕо олоҕо уонна быраастар, мэдиссиинискэй сиэстэрэлэр үлэлэрэ биллэрдик чэпчиэ этэ. Тоҕо диэтэххэ, ыарыһах оҕо туохха наадыйарын киниэхэ саамай чугас киһититтэн ордук ким билиэй, таайыай?» -– диэн Судаарыстыбаннай дуума дьокутаата, РФ доруобуйа харыстабылыгар кэмитиэтин бэрэссэдээтэлин солбуйааччы Бадма Башанкаев иһитиннэрэр.
Билиҥҥитэ 4-гэр эрэ диэри саастаах оҕолор төрөппүттэрин кытары бииргэ сытар бырааптаахтар. Кинилэр төрөппүттэригэр мэдиссиинискэй тэрилтэ босхо куойканы уонна аһылыгы көрөр. Оттон инбэлиит оҕолоох төрөппүт эрэ барыта балыыһаҕа харчы төлөөн сытыһар кыаҕа суох.
Оҕо эмтэнэр реанимация уонна интенсивнэй терапия отделениеларыгар аймахтары киллэрэр, бииргэ сытыарар туһалааҕа науканан дакаастанан турар.
Оҕо түргэнник үтүөрэр, кини дьиэ кэргэнэ уонна эмчиттэр уйулҕалара уоскуйар, социальнай ыктарыы балаһыанньата аҕыйыыр.
Инбэлиит оҕолор балыыһаҕа төрөппүттэрин кытары сытыахтаахтарын туһунан сокуон барылын РФ Доруобуйаҕа харыстабылын министиэристибэтигэр өйүүллэр, кыра көннөрүүлэри киллэрэн баран сокуоҥҥа үлэлииргэ бэлэмнэр.
Надежда ЕГОРОВА, «Саха сирэ», edersaas.ru