Инбэлиит дьиэ атыылаһарга социальнай төлөбүрү ирдиир сайабылыанньаны Госуслуги нөҥүө хайдах биэриэн сөбүй?  

Ааптар: 
Бөлөххө киир:

Биһиги дойдубутугар көмүскэлгэ ордук наадыйар гражданнарга көмө оҥорорго анаммыт бэрт көдьүүстээх хайысха үлэлиир. Чуолаан инбэлииттэргэ уонна инбэлиит оҕолоох ыалларга олохторун тупсарарга анаммыт туспа ньымалар бааллар.

Холобур, Арассыыйа үрдүнэн бу категорияҕа киирсэр гражданнарга олорор дьиэлэрин усулуобуйатын тупсарарга анаммыт туспа төлөбүрдэр – дьиэ атыылаһарга эбэтэр туттарга анаммыт үбү сокуонунан ылыахтарын сөп. Саха сиригэр итинник төлөбүрү тус бэйэлэрэ аналлаах уорганнарга сайабылыанньа суруйан, эбэтэр эрэгийиэннээҕи судаарыстыбаннай уонна муниципальнай өҥөлөр Порталларын (https://e-yakutia.ru) нөҥүө сайабылыанньа түһэрэн ылыахтарын сөп.

Билигин дойдубут сокуоннарыгар баар биир ураты балаһыанньаҕа болҕомтону ууруох тус­таахпыт – дьиэ ылар уочаракка турбут инбэлииттэри икки туспа бөлөххө араарыахха сөп: 2005 сыл тохсунньу 1 күнүн иннинэ уочаракка турбуттарга уонна ити болдьох кэнниттэн испииһэккэ киирбиттэргэ.

2005 сыл иннинэ уочаракка турбуттар социальнай төлөбүргэ бырааптара федеральнай таһымҥа быһаарыллар, оттон хойут уочараттаахтар олохтоох таһымҥа көрүллэллэр.

2005 сылга диэри учуокка турбут инбэлииттэр социальнай наймылаһыы дуогабарынан олорор дьиэ ылар бырааптаахтар. 181 №-дээх федеральнай со­­куон кинилэргэ атыылаһыыга дьиэ сыанатын сороҕун төлүүргэ субсидия олохтуур. 2005 сыл кэнниттэн учуокка турбут дьон уопсай уочарат быһыытынан олох­тоох бэйэни салайыныы уорганнарынан олорор дьиэнэн хааччыллаллар.

Олохтоох бэйэни салайыныы уорганнарыгар олорор дьиэни кэҥэтиигэ наадыйааччы быһыытынан уочаракка регистрацияланыах тустаахтар.

Бу ыстатыйаҕа 2005 сыл  тохсунньу 1 күнүн кэнниттэн уочаракка турбут гражданнар социальнай төлөбүрү хайдах ылыахтарын сөбүн туһунан кэпсиэхпит. Саха сиригэр итинник төлөбүрү тус бэйэлэрэ аналлаах уорганнарга сайабылыанньа суруйан, эбэтэр эрэгийиэннээҕи судаарыстыбаннай уонна муниципальнай өҥөлөр Порталларын (https://e-yakutia.ru) нөҥүө сайабылыанньа түһэрэн ылыахтарын сөп.

Эрэгийиэннээҕи судаарыстыбаннай уонна муниципальнай өҥөлөр Порталларыгар (https://e-yakutia.ru) «Предоставление социальной выплаты на приобретение или строительство жилья инвалидам и семьям, имеющим детей-инвалидов, нуждающихся в улучшении жилищных условий и вставших на учет до 1 января 2005 года» диэн туспа пуун баар. Онно сайабылыанньаны электроннай ньыманан хайдах быһыылаахтык толорор туһунан сиһилии быһаарыллар.

Холобур, сайабылыанньаны ылыы араас кэрчиктэрин болдьохторо ыйыллыбыттар. Ол курдук, сайабылыанньа толоруллуох­таах кэмэ 10 хонугунан хааччахтаммыт, оттон киирбит са­­йабылыанньаны регистрациялааһын биир үлэ күнүн иһигэр түмүктэниэхтээх.

Сайаапканы толороргутугар өйдүөх тустааххыт – ханнык эрэ кыра сыыһалаах толоруу түмүгэр сайабылыанньаҕытыгар ак­­каас кэлиэн сөп. Ол иһигэр:

– Бэриллибит докумуоннарга суруллубуту көннөрүү баар буоллаҕына. Эбэтэр көннөрүү Арассыыйа Федерациятыгар ылыныллыбыт ньыманан бигэргэтиллибит буолуохтаах;

– Докумуоҥҥа киирбит информацияны толору өйдүүргэ мэһэйдиир алдьатыы, хайа тардыы баар буоллаҕына;

– Электроннай ньыманан бэриллибит сайабылыанньа ирдэниллэр форманы кэһиилээх толоруллубут буоллаҕына;

– Формаҕа баар строкалар ситэри толоруллубатах буоллахтарына;

– Бары ирдэнэр докумуоннары толору биэрбэтэх буоллахтарына;

– Өҥөнү ирдиир сайабылыанньа бу өҥөнү оҥоруунан дьарык­таммат судаарыстыбаннай уоргаҥҥа эбэтэр бэйэни салайыныы уорганнарыгар ыытыллыбыт буол­лаҕына.

Сайабылыанньа бигэргэнэн оруннааҕынан билинилиннэҕинэ, сайабылыанньа суруйааччыга анаммыт социальнай төлөбүрү атыыһыкка уонна (эбэтэр) ту­­тааччыга төлүүр туһунан эбэһээтэлистибэни атыы дуогабарыгар (атыы, тутуу, тутууга өлүүлэһии) сыһыарыы быһыытынан бэриллэр. Эбэтэр сайабылыанньа суруйааччыга тоҕо кини сайабылыанньатыгар аккаас бэриллибитин туһунан сиһилии хоруй ыытыллар.

Эрэгийиэннээҕи судаарыстыбаннай уонна муниципальнай өҥөлөр Порталларын (https://e-yakutia.ru) нөҥүө сайабылыанньа түһэрии сылаалаах уочараттарга турбакка, бэрт түргэнник ту­­руоруммут сыалларгытын ситиһэр ньыма. Дьиэтиттэн тахсыбакка эрэ электроннай форманы толороот, сайабылыанньа биэрээччи кини кыһалҕатынан аналлаах уорганнар сонно тута дьарыктанан баралларыгар эрэллээх буолуон сөп.

«Саха сирэ» хаһыат

+1
0
+1
0
+1
0
+1
0
+1
0
+1
0
+1
0