Үс күнүнэн Нерюнгри оройуонугар Арассыыйаҕа чоҕу хостуур шахталартан биир саамай бөдөҥ «Инаглинскай» шахта уонна «Инаглинскай-2» фабрика үлэлэрин саҕалыахтара. СӨ бырамыысыланнаска уонна геологияҕа миниистирэ Максим Терещенко бу саҥа эбийиэктэр киириилэрэ аан дойдуга чоҕу оҥорон таһаарыыга уонна экспортка Арассыыйаны үс иһигэр киллэриэхтээх диэн бэлиэтиир.
— «Инаглинскай» шахта уонна «Инаглинская-2» фабрика бастакы уочараттаах үлэлэрэ аан дойдуга чоҕу оҥорон таһаарыыга уонна экспортка Арассыыйаны үс иһигэр киллэриэхтээх. Бу биллэн турар, «Колмар» чоҕу хостуур хампаанньа сүдү суолталаах бырайыага. Былаан быһыытынан, бу эбийиэктэртэн саамай элбээбитэ сылга 12 мөлүйүөн туонна чоҕу хостоон таһаарыахтаах. Ону таһынан, 800 саҥа үлэ миэстэтин таһаарда. Онон, Саха сирин чоҕу хостуур бырамыысыланнаһа Уһук Илиҥҥэ да, дойдуга да бастакы миэстэтин чиҥэтэн биэриэ, — диэн Максим Терещенко эттэ.
Бүгүҥҥү күҥҥэ вагоннары көрсөргө уонна тиэллибит састааптары ыытарга «Инаглинская-2» фабрика сиригэр киирэр суоллар, тимир суол ыстаансыйалара тутуллубуттара. Ону таһынан, камернай-столбовой ньыманан хостонуллар чоҕу хаһан ылар сир тутуллара былааннанар.
Бу — бырамыысыланнаска улахан хардыы. Чоҕу хостуур эбийиэктэргэ куттала суох буолууну, эрэли эрэннэриэххэ наада. Төһө да коронавирустан сылтаан хааччахтааһын баар буоллар, үлэ таһаарыылаах буолуо диэн мин эрэнэбин, — диэн Максим Терещенко бэлиэтээтэ.
СИА саайтыттан.