Үөрэҕи «Колмар» тэрийдэ. «Инаглинскайдааҕы» шахта шахтердара уонна инженернэй-тэхиньиичэскэй үлэһиттэрэ монорельсовай дизелевозтарынан хааччыйааччыттан тэрили өрөмүөннүүргэ, үлэлэтэргэ, тэхиньиичэскэй көрүүгэ-истиигэ үөрэннилэр.
Хампаанньа «SCHARF» сүрүн инженерэ Никита Нигматулин шахтаҕа үлэлиир тэрили көрүүгэ-истиигэ тэхиньиичэскэй ымпыгын-чымпыгын уонна өрөмүөн туһунан сиһилии быһаарда диэн иһитиннэрэр. Үөрэх бырагырааматын иитинэн, ордук сотору-сотору үөскүүр боппуруоһу уонна тэхиньиичэскэй кыһалҕаны хайдах быһаарары дьүүллэстилэр, санааларын үллэһиннилэр. Маныаха исписэлиистэр туһанылла сылдьар тиэхиньикэни, тэрили кэмигэр көрүү-истии, хаачыстыбалаах өрөмүөнү оҥоруу үлэһиттэр үөрүйэхтэринэн буолуохтааҕа бэлиэтэннэ.
«Шахтаҕа үлэ тохтоло суох салҕанарын ситиһэр туһуттан, тэхиньиичэскэй үлэһиттэр идэлэригэр билиилэрин-көрүүлэрин тиһиктээхтик үрдэтэр наада. Биһиги үлэбитигэр туһанар аныгы ньымаларбыт балачча кыаҕы биэрэллэр. Маныаха Арассыыйаҕа бөдөҥ шахталар халыыптарыгар сөп түбэһэргэ уонна аныгы үйэни кытары тэҥҥэ хардыылырга кыһаллабыт. Тиэхиньикэҕэ быһаччы сыһыаннаах үлэһиттэргэ билии-көрүү куруук туһалыыр», — диэн хайа байытар комплекс дириэктэрэ Геннадий Урбанов бэлиэтиир.
Санатан эттэххэ, «Олохтоох каадыры — бырамыысыланнаска» бырайыагынан, быйыл 10 тыһыынчаттан итэҕэһэ суох киһини үлэнэн хааччыйыы былааннанар.