Нерюнгри оройуонугар Арассыыйаҕа чоҕу хостуур шахталартан биир бөдөҥ «Инаглинскай» шахта уонна «Инаглинскай-2» фабрика үлэлэрин бу күннэргэ саҕалыахтара. СӨ Бырамыысыланнас уонна геология миниистирэ Максим Терещенко бу саҥа эбийиэктэр киириилэрэ дириҥ экэнэмиичэскэй уонна бэлитиичэскэй суолталаахтар диэн бэлиэтээбитэ. Оттон чоҕу хостуур салааҕа иһиттэн үлэлии сылдьар дьон туох санаалаахтарый?
edersaas.ru
Сергей Иванович Рябко, «Якутуголь» ААУо үлэһиттэрин биир идэлээх сойуустарын бэрэссэдээтэлэ:
—Өссө биир бөдөҥ шахта арылларыттан биһиги үөрэбит эрэ. Тыһыынчанан үлэ миэстэтэ тахсыбыта олус үчүгэй. Билигин шахталарга ханнык эмэ кыра да, улахан да үлэ хамсыырыгар бэдэрээччит тэрилтэлэр үлэлэһэллэр. Чоҕу хостуур ыарахан уонна эппиэтинэстээх үлэҕэ анал тиэхиньикэлээх, саамай кылаабынайа анал үөрэхтээх дьон кэлэн үлэлииллэр. Ол онно үксүгэр атын регионнартан кэлэн үлэлээн барааччылар. Инаглинскай шахтаҕа олохтоох дьону – өрөспүүбүлүкэттэн уонна Нерюнгри оройуонуттан ылыахтара диэн биһиги эрэнэбит. Онно үчүгэй таһымнаах үлэһиттэр наадалар.
Эдуард Владимирович Дажин, “Денисовскай” шахта 7-с №-дээх учаастагын мэхээнньигэ:
— Мин чоҕу хостуур бырамыысыланнаска үлэлээбитим 16-с сылыгар барда. Учаастагым шаахта саамай түгэх, уулаах сиригэр баар. Онон, син балай даҕаны уһуннук үлэлээбит уонна саамай кирдээх үлэҕэ сылдьар киһи быһыытынан, саҥа эбийиэк шахтердарыгар тулууру уонна доруобуйаны баҕарабын.
Виктор Захаров, сүрүннүүр маркшейдер:
—Маркшейдер диэн сэдэх идэ. Кини – сир аннынааҕы штурман, судургутук эттэххэ, биһиги шахтердарга суолу тэлэн биэрээччи дьон буолабыт. Геодезическэй мээрэйдэри оҥорор, сир аннынааҕы уонна хайа аһаҕас эттиктэрин уһулар уонна мээрэйдиир үлэһит буолабыт.
Дьикти, хатыламмат килиимэттээх усулуобуйаҕа үлэлиирбит, биллэн турар, ыарахан. Ол эрээри, соччонон интэриэһинэй, идэ романтиката үөскүүр да диэххэ сөп. Уһук Илин саамай бөдөҥ промышленнай тутууларыгар – Инаглинскай уонна Денисовскай шахталарга үлэлиирбинэн киэн туттабын.
Виктория Бястинова, edersaas.ru сайт