Бу күннэргэ «Сыл бастыҥ дьиэ кэргэнэ” өрөспүүбүлүкэтээҕи дьиэ кэргэҥҥэ анаммыт бэстибээл түмүгэ таҕыста.
edersaas.ru
«Мин дьиэ кэргэним — мин өрөспүүбүлүкэм» диэн девизтээх суолталаах тэрээһин быйыл «Дьиэ кэргэн үгэһин харыстааччы», «Тыа сирин ыала», «Элбэх оҕолоох ыал», «Эдэр ыал», «Көһө сылдьар ыал» — биэс номинациянан кэтэхтэн ыытылынна. Куонкуруска 32 муниципальнай оройуонтан 86 дьиэ кэргэн кыттынна. Булуҥтан, Мииринэйтэн, Аллараа Халыматтан уонна Усуйаанаттан эрэ кыттыыны ылбатылар.
“Бастыҥ тыа сирин ыала” күрэх кыайыылаахтарынан Горнай улууһун Орто Суртан нэһилиэгин бастыҥ ыала Сахая уонна Виталий Илюхиннар ааттаннылар. «Кыайыыларынан эҕэрдэлээн туран, дьолу, табыллыыны, этэҥҥэ буолууну баҕарабыт!» — диэн биир дойдулаахтара эҕэрдэлэрин этэллэр. Бу номинацияҕа Маҥаны улууһун олохтоохторо иккис сылын субуруччу кыайыыны ситиһэллэр. 2019 сыллаахха Алексей уонна Ксения Вензеллэр кыайбыттара. 2018 сыллаахха эмиэ Маҥаныттан төрүттээх Мэҥэ Хаҥалас Бүтэйдээҕиттэн Афанасий уонна Ньургуйаана Прокопьевтар «Тыа сирин ыала», Бэрдьигэстэхтээхтэн Федор уонна Туйаара Максимовтар «Эдэр ыал» номинацияларга кыайбыттара. Ньургуйааналаах Туйаара бииргэ төрөөбүт аҕыс-балыстар.
Онон Орто Сурт олохтоохторо бэйэлэрин «тыа сирин бастыҥ ыалларын иитэр нэһилиэгинэн» ааҕыналлара оруннаах. Биир нэһилиэктэн Дьиэ кэргэн өрөспүүбүлүкэтээҕи бэстибээлигэр сыл аайы бастыыр эдэр ыаллардаах нэһилиэккэ быйыл Ийэ дойдуга бэриниилээх буолуу сылыгар аны Илюхиннар интернациональнай дьиэ кэргэн бэйэлэрин кыайыыларын бэлэх ууннулар.
Онон сыл аайы Дьиэ кэргэн бэстибээлигэр бастыыр ыаллардаах Маҥаны ураты сахалыы тыыннаах нэһилиэк буолара чахчы.
Елена ПОТОЦКАЯ, «Саха сирэ» хаһыат, edersaas.ru