Ил Түмэн Норуоттар икки ардыларынааҕы II Хотугу пуоруму ыытарга бэлэмнэнэр
Арктика уонна Хоту сир олоҕор-дьаһаҕар туһуламмыт сокуоннар, бырааптар төһө сөптөөхтөрүн, эбии тугу киллэриэххэ сөбүн туһунан Норуоттар икки ардыларынааҕы II Хотугу пуорумҥа кэпсэтиэхтэрэ.
edersaas.ru
Ил Түмэҥҥэ Норуоттар икки ардыларынааҕы II Хотугу пуорум чэрчитинэн балаҕан ыйын 29 күнүгэр «Хоту сир уонна Арктика олох-дьаһах, быраап өттүнэн көрүү, бигэ сайдыытын олуктара» диэн сессия ыытыллар.
Коронавирус пандемиятынан сибээстээн пуорум онлайн киэбинэн барыаҕа.
Арассыыйа хотугу уонна арктическай субъектарын, тас дойдулар сокуону оҥорор былаастарын бэрэстэбиитэллэрэ, эcпиэрдэр Арктика национальнай уонна эрэгийиэннээҕи сокуоннарын хайдах өссө тупсарар, эҥкилэ суох сөптөөх гына оҥорор туһунан кэпсэтиэхтэрэ, уопут атастаһыахтара, баар кыһалҕалары аһаҕастык ырытыахтара, сокуону оҥорууга бастыҥ быраактыканы көрүөхтэрэ.
Парламентарийдар Хоту уонна Арктика инфраструктуратыгар туһуламмыт Арассыыйа сокуонун тула боппуруостары, нормативнай-правовой хааччыллыытын ырытыахтара, тырааныспар, суол-иис, сырыы-айан хайдаҕын, таһымын, суолтатын, кэскилин, онуоха көдьүүстээх технологиялары, экологияҕа куттала суох тиэхиньикэни туһаныы туһунан төрдүттэн түөрэн, иҥэн-тоҥон кэпсэтиэхтэрэ.
Сессия түмүгүнэн докумуон ылыллан, резолюцияҕа киллэриллиэ. Ону Арктика сэбиэтин үлэтин кэтиир-хонтуруоллуур бырааптаах, аан дойду циркумполярнай эрэгийиэннэрин сайыннарар соруктаах “Хотугу Пуорум” тэрилтэҕэ аадырыстыахтара.
Сессия үлэтигэр тас дойдуттан сокуон оҥоруу уорганнарын бэрэстэбиитэллэрэ кыттыыны ылаллара сабаҕаланар. Ол иһигэр Арктика эрэгийиэнин парламентарийдарын Бастайааннай кэмитиэтин (SCPAR) бэрэссэдээтэлэ Эрик Сивертсен, бу кэмитиэт чилиэннэрэ: Норвегия Саамскай парламенын чилиэнэ Аили Кескитало, АХШ сенатора Лиза Мурковски, Исландия парламенын дьокутаата Ари Траусти Гудмунсон, Лапландия эрэгийиэннээ5и сэбиэтин чилиэнэ Мика Риипи.
Сүрүн дакылаатынан Арассыыйа Судаарыстыбаннай Думатын бэрэссэдээтэлин солбуйааччы Ольга Епифанова, эрэгийиэннээҕи бэлиитикэ, Хоту сир уонна Уһук Илин проблемаларын Кэмитиэтин бэрэссэдээтэлэ Николай Харитонов, сенатордар Виктор Новожилов, Александр Акимов, Татьяна Кусайко уо.д.а. кыттыахтара.
Тэрээһиҥҥэ, маны сэргэ, Госдуума дьокутааттара Валентина Пивненко, Оксана Бондарь, Владимир Пушкарев, Федот Тумусов, Галина Данчикова, Камчатка, Хабаровскай, Красноярскай кыраай, Чукотка, Ненецкэй, Ямало-Ненецкэй, Ханты-Мансийскай автономнай уокурук сокуону оҥорор уорганнарын бэрэстэбиитэллэрэ, биллэр эспиэрдэр, наука, үөрэхтээһин өттүгэр уопсастыбаннай түмсүүлэр кыттыыны ылыахтара.
Ирина Ханды, “Саха сирэ” хаһыат, edersaas.ru