Сүрүн Успуорт

Ильмень күөлү эргийэ сүүрүүнү Сардаана Трофимова өйөөтө

Сүүрүү марафонугар Арассыыйа биэс төгүллээх чөмпүйүөнэ Сардаана  Трофимова буойун-сахалар сырдык кэриэстэригэр Ильмень күөлү эргийэ сүүрүүнү өйөөтө, ону ааһан тэрээһин көҕүлээччитинэн уонна тэнитээччитинэн (амбассадорунан) буолла.

Сардаана Трофимова видеонан ыҥырыытын көрүҥ.

Чэпчэки атлетикаҕа сүүрүү номнуо иккис төгүлүн ыытыллыаҕа. Ыам ыйын 4-7 күннэригэр Саха сирин биэс спортсмена Арассыыйа биир бөдөҥ күөлүн тула 260 км-тэн ордук уһуну сүүрүөхтэрэ.

Сүүрүүгэ Аҕа дойду Улуу сэриитин кыттыылаахтарын сыдьааннара кыттыахтара. Бырайыагы көҕүлээбит Саха сирин спордун бэтэрээнэ Дмитрий Горохов сүүрүүнү салайыаҕа.

Бу сылга төрөөбүт дойдуга бэриниилээх буолуу сүүрүүтүн Улуу Новгород олохтоох спортсменнара өйүөхтэрэ. NovgorodRun сүүрүү кулуубун 20 чилиэнэ саха сүүрүктэригэр кыттыһыахтара.

Ыам ыйын 7 күнүгэр биэтэккэ сүүрүү түһүмэҕэр Старорусскай оройуон 40 үөрэнээччитэ кыттыыны ылыахтара.

0
0
Telegram Whatsapp