«Илин» космодромтан спутниктардаах аракыата космоска тахсара ахсынньы 22 күнүттэн кэлэр сыл саҕаланыытыгар көстө диэн «Роскосмос» генеральнай дириэктэрин солбуйааччы Александр Иванов биллэрдэ.
edersaas.ru
Александр Иванов, «Роскосмос» генеральнай дириэктэрин солбуйааччы:
— «Илин» космодромҥа аракыатаны бэлэмниир үлэлэри уһаттыбыт. Космодромҥа үлэлиир тэрилтэлэр ахсынньы 25 күнүгэр диэри «Канопус» аппарааты бэлэмниир тэрээһиннэри толкуйдуохтаахтар. Онтон аппарааты космоска таһаарарга аччаабыта 15 хонук бэлэмнэнии барыан наада. Сабаҕалааһын быһыытынан, тохсунньу бүтүүтэ аракыатаны көтүтүөхпүт.
Санатан эттэххэ, сэтинньи 28 күнүгэр «Метеор-М» аргыстаах «Союз-2.1б» «Илин» космодромтан көппүтэ. Үс чаас буолан баран сибээстэн сүтэн хаалбыта. «Роскосмос» тэрийбит анал хамыыһыйата ««Фрегат» диэн түргэтэтэр блок сыыһа үлэлээн, спутнигы анаммыт орбитатыгар таһаарбата» диэн биллэрбитэ. Атлантическай акыйааҥҥа түспүт буолуон сөп диэн сабаҕалыыллар.
Николай ПОПОВ, «Саха сирэ» хаһыат, edersaas.ru