Халлаан сылыйан иһэр, икки ый курдугунан өрүстэрбит халыҥ муустарыттан босхолонон, хааларыттан тахсаары ыксатыахтара турдаҕа. Билиҥҥи уустук балаһыанньаҕа быйыл сааскы көмүөл этэҥҥэ аастар ханнык диэн санаалаах олоробут.
Бу күннэргэ «Ленарегионводхоз» филиалын уонна Өлүөнэ тардыытынааҕы управлениетын исписэлиистэрэ федеральнай уонна өрөспүүбүлүкэтээҕи надзордуур уорганнары кытта Илин эҥэр улуустарга баар ууну аһардарга аналлаах гидротэхэньиичэскэй тутуулар туруктарын, бэлэмнэрин бэрэбиэркэлээтилэр. Ол курдук, Чурапчы улууһугар Куоҕалы, Харыйалаах, Чэччимэ-Маралай, Үрүҥ Күөл диэн сирдэргэ тыа хаһаайыстыбатыгар аналлаах быһыттары, ууну хаһаанар анал сирдэри уонна Таатта улууһун Ытык Күөлүн харыстыыр гидротэхэньиичэскэй тутууну көрдүлэр-иһиттилэр.
«Ленарегионводхоз» филиалын суһал дьуһуурустубаҕа отделын начаалынньыга Николай Портнягин: «Сааскы халаан чугаһаабытынан Илин эҥэр улуустарга баар гидротэхэньиичэскэй тутуулар туруктарын көрдүбүт. Тустаах тэрилтэлэр исписэлиистэрэ улуустар дьаһалталарын үлэһиттэрин кытта анал бэрэбиэркэни оҥордубут. Баар быһыттары уонна ууну мунньарга аналлаах тутуулары ирдэбил быһыытынан өрөмүөннүү сылдьаллар. Онон бэрт сотору тустаах гидротэхэньиичэскэй тутуулар сааскы халаан иннинэ бэлэм буолуохтара», — диэн быһаарда.