Дьокуускайдааҕы көтөр фабриката киин куорат хабыллар хаба ортотугар турар “Илин эҥээр” маҕаһыыҥҥа “Саха сиригэр оҥоһулунна” бырайыак чэрчитинэн бородууксуйатын батарар өссө биир табыгастаах миэстэлэннэ. Фабрика эппиэттээх үлэһиттэрэ көтөр этиттэн астаммыт эгэлгэ бүлүүдэлэри астаан аҕалбыттарын уонна сибиэһэй сымыыты маҕаһыыҥҥа кэлбит атыылаһааччыларга тута буһаран амсаттылар.
Дьон “Дьокуускай фабрикатын кууруссата спортсмен” диэн өйдөбүллээх, ол эбэтэр көтөрүн этэ кытаанах, барыта иҥиир дии саныыллар. Ити — урукку хаалынньаҥ санаа. Тэрилтэ сымыыты уонна эти оҥорон таһаарыыга салайааччыта Сардаана Скрябина быһааран билиһиннэрбитинэн, фабрика биир сырыыга 30 тыһ. чоппуусканы анаан аһатан төлөһүтэн баран, 70-80 хонуктарыгар 900-1100 грамы үктүүр буолбут ыччат көтөрдөрү эккэ туттар технологияҕа киирбит. Маннык көтөр төһө даҕаны бройлер буолбатаҕын иһин, этэ сымнаҕас, минньигэс буолар. Бройлертан уратыта диэн сыата-хаһата суох, ол аата – диетическэй.
Иккиһинэн, сымыыттыыр куурусса 1,8-2 сааһын аастар эрэ, эккэ барар дьылҕалаах. Урут уҥуохтуун-иҥиэхтиин эрийэн баран, астыыр буоллахтарына, билигин уҥуоҕуттан арааран, этин эрэ эрийэн астыырга киирбиттэр. Полуфабрикаттар “Илин эҥээр” маҕаһыыҥҥа бэйэлэрэ туспа холодильниктаахтар. Сардаана Самсоновна этэринэн, киин куоракка 22 эргиэн туочукаламмыттар. Сылга 60 мөлүйүөн сымыыт, 200 туонна эт оҥоһуллан тахсар. Онон бородууксуйаны батарыыны сатабыллаахтык тэрийэн, туһанааччыларга кэмигэр тиэрдии – тирээн турар соруктартан биир тыын суолталаахтара.
Василий НИКИФОРОВ, “Саха сирэ” хаһыат, edersaas.ru