Илимнииргэ Орловскай уобаластан ынахтары аҕаллылар...
· - Олох-дьаһах

Илимнииргэ Орловскай уобаластан ынахтары аҕаллылар

Сунтаар улууһугар тыа хаһаайыстыбатын сайыннарар, олохтоохтору  үүт аһылыгынан хааччыйар  сыалтан, «Татыйыына» хампаанньа салайааччыта Н.П.Герасимова  көҕүлээһининэн, бу саас «Ил-Тосхол» диэн тыа хаһаайыстыбатын кэпэрэтиибэ тэриллибитэ.

 edersaas.ru

Ааспыт нэдиэлэ бүтүүтэ кэпэрэтиипкэ кэтэһиилээх уонна долгутуулаах түгэн буолла. Ол курдук, Илимниир нэһилиэгэр ыраах Орловскай уобаластан  18 күнү быһа айаннаан 120  ынах сүөһүнү аҕаллылар.

Сыаналаах таһаҕаһы урбаанньыт  Николай Мочкин (Таатта) хамаандата аҕалла. Ол курдук уолаттар араас улуустартан сылдьаллар: Андрей Мочкин  Тааттаттан, Юрий Николаев  Үөһээ Бүлүүттэн, Алексей Капитонов Ньурбаттан, Григорий Сивцев Дьокуускайтан.  Уолаттар биэс массыынанан Орел — Тамбов — Ижевск-Татарстан — Башкирия — Челябинскай — Омскай -Новосибирскай -Братск -Уус Кут — Ленскэй — Илимниир хайысхатынан 10600 км  ааһан кэллилэр.

Бырайыак салайааччыта Зинаида Васильевнаны кытары сибээстэһэ сырыттыбыт. Онуоха:

— Бу бырайыагы саҕалаары элбэх хаһаайыстыбалар үлэлэрин үөрэтэн көрбүттэрэ. Онтон миигин бырайыак салайааччыта буол диэн ыҥырбыттара.  Муус устар 14 күнүгэр «Ил Тосхол»  ТХПК регистрациялаабыппыт. Бастаан хотон тутуутун бырайыагын саҕалаабыппыт.  Сунтаартан чугас Илимниир сирин булан, баһылык сөбүлэҥин ылан сир боппуруоһун быһаарсыбыппыт. Салгыы оттуур ходуһалары арендаҕа ылан, анал техникалары атыыласпыппыт.
Хотоммутун тутууга «Татыйыына» фирма  тутууга салаата ыытар.   Алтынньы  5 күнүгэр былаан быһыытынан бүтүөхтээх.
Кылаабынай боппуруоспут  ынах атыылаһааһына этэ. Манна элбэх хаһаайыстыбалары кытта үлэлэһэн баран, Орловскай уобаластан симменталь боруодалары атыыластыбыт.  Билигин айаннаан кэлэн карантиҥҥа тураллар.
Куйаар ситимигэр арааһы суруйар буоллулар. Бу бырайыакка аҥаардастыы «Татыйыына» фирма барытын бэйэтин үбүнэн үбүлээтэ.  Онон бу үтүө холобуру улуус, өрөспүүбүлүкэ кыахтаах урбаанньыттара холобур оҥостуохтара диэн эрэнэбит, — диэн кэпсээтэ.

Нина Герасимова салайааччылаах «Татыйыына» хампаанньа тыа сиригэр үлэ миэстэтин таһаарыыга сыал-сорук оҥостон үлэлиир. Ол курдук Аллыҥаҕа «Ал-Су» переработка пуунугар 6 киһи үлэлиир, Илимнииргэ «Ил-Тосхол» хаһаайыстыбаҕа 15 киһи үлэлиэҕэ.

edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

восемь + восемнадцать =