Сэтинньи 2 күнүгэр Сунтаар улууһун Аҕа баһылыга Анатолий Григорьев, тутуу комплексын управлениетын салайааччыта Иван Егоров уонна тыа хаһаайыстыбатын управлениетын салайааччытын солбуйааччы Прокопий Никитин Илимниир уонна Бордоҥ нэһилиэктэригэр саҥа тутулла турар эбийиэктэргэ үлэ хаамыытын билистилэр.
edersaas.ru
Илимнииргэ нэһилиэк килбэйэр киинигэр «Переселение из ветхого и аварийного жилья» бырагыраама чэрчитинэн аҕыс кыбартыыралаах толору хааччыллыылаах таас дьиэ тутуллар. Эбийиэккэ «Сунтарэнерго» ХЭТ тэрилтэ тутууну ыытар, былаан быһыытынан быйыл түөрт квартира бэлэм буолан үлэҕэ киириэхтээх.
Салгыы оробуочай бөлөх чилиэттэрэ «Татыйыына» фирма тэрийиитинэн ТХПК «Ил Тосхол» тэрилтэ 120 төбө киирэр аныгы тииптээх хотон туппутун көрдүлэр-иһиттилэр.
Зоотехник Елизавета Ершова иһитиннэрбитинэн, саҥа хотоҥҥо барыта механизированнай буолан үлэлииргэ судургу, Орловскай уобуластан 120 төбө ыанар ынаҕы аҕалан кыстата тураллар.
Бордоҥ нэһилиэгэр 1967 сыллаахха тутуллан үлэҕэ киирбит «Айыллаан» КК дьиэтин саҥардан саҥа кулууп тутуллар. Онно «Основа» ХЭТ тэрилтэ сыбаайа түһэриитигэр үлэ ыытар.
«Сунтаар улууhа (оройуона)» муниципальнай оройуон дьаһалтатын пресс–сулууспата.