Саха Өрөспүүбүлүкэтин олохтоохторо 542 учаастакка илиминэн балыктыылара көҥүллэннэ, ол иннигэр илимнээһин 28 эрэ учаастакка көҥүллэнэрэ.
edersaas.ru
«Любительскэй балыктааһын уонна Арассыыйа Федерациятын кэккэ сокуоннарын аакталарыгар уларытыылары киллэрэр туһунан» федеральнай сокуоҥҥа Уһук Илиннээҕи балык хаһаайыстыбатын бассейныгар балыктааһын саҥа Быраабылалара ырытыллан оҥоһулунна. Бу докумуон быһыытынан, Саха Өрөспүүбүлүкэтин нэһилиэнньэтэ сууккатааҕы нуормаҕа сөп түбэһиннэрэн, анаан быһыллыбыт 177 өрүс итиэннэ 365 күөл учаастактарыгар, Сибиир хатыыһыттан ураты балыктарга, илимниирэ көҥүллэннэ. Онуоха илими тустаах биэдэмистибэҕэ учуокка туруортарар эрэ ирдэнэр. Өрүс учаастактарын кыраныыссалара географическай координаттарынан бэлиэтэннэ. Саҥа Быраабылалар бигэргэтиллиэхтэригэр диэри илиминэн балыктааһын Арктика улуустарын олохтоохторугар 28 учаастакка итиэннэ туспа сытар соболоох күөллэргэ эрэ көҥүллэнэрэ.
Саҥа Быраабыла олоххо киллэриллэрин Ил Дархан Айсен Николаев туруорсан ситистэ. Ол туһунан Айсен Сергеевич инстаграмыгар бүгүн маннык суруйда:
— Өрөспүүбүлүкэ араас улуустарыгар командировкаҕа сырыттахпына, нэһилиэнньэ илиминэн балыктааһыны көҥүллүүргэ мэлдьи туруорсара. Кырдьык, боппуруоһу быһаарар наада этэ! Ол иһин Арассыыйа тыатын хаһаайыстыбатын миниистирэ Дмитрий Николаевич Патрушевы уонна Балыктааһын федеральнай ааҕыныстыбатын салайааччы — Арассыыйа тыатын хаһаайыстыбатын миниистирин солбуйааччы Илья Васильевич Шестакову кытары кэпсэппиппэр, өйөөтүлэр! Онон билигин өрөспүүбүлүкэ бары улуустарын олохтоохторугар өрүскэ уонна күөлгэ анал быһыллыбыт учаастактарга бэйэ сииригэр анаан илимниир көҥүллэннэ. Балыктааһын саҥа быраабылаларын туһунан Экология, айылҕа харыстабылын уонна ойуур хаһаайыстыбатын министиэристибэтин сайтыгар https://minpriroda.sakha.gov.ru билсиэххитин сөп. Махтал Илья Васильевичка уонна Дмитрий Николаевичка өйөбүллэрин иһин! Оттон бары балыксыттарга ситиһии уонна өлгөм бултуйуу тосхойдун!
Раиса Сибирякова, «Саха сирэ» edersaas.ru