Тохсунньу тоһуттар тымныыта бүтэн, туман сайҕанан, биһигинньик дьон, дьэ, дьиэттэн бычыахтаһар буолан эрэбит. Халлаан көҕөрөн, салгын чэбдигирэн, саас кэлэн иһэрэ сибикилэнэн, таһырдьа үчүгэйэ бэрт! Төһө да сүһүөх уйбатар, киһи олох олоруон, кэрэни кэрэхсиэн, туохтан эрэ эппэйэ үөрүөн баҕарар. Бэйи, тохтуу түһүөххүт ээ, Биэтэскит өссө да салгыны киртиппэхтии түһэрэ буолуо ээт!.
Онон, дьиэттэн тахсыбычча, тастыҥ быраатым аахха барарга сананным. “Быраат” биэнсийэҕэ тахсыбыта быданнаата да буоллар, үлэлии сылдьар, ханнык эрэ тэрилтэҕэ харабыллыыр. Чэ, оҕо эрдэҕиттэн да биир сиргэ таба олорбот эрдьигэн этэ. Ону хата, өрөбүл күнүгэр түбэстим ээ.
— Ок! Убайым кэллэ, — диэт, болкуоҥҥа ойон тахсан, омуннаабакка эттэххэ, убаһа сыалаах ойоҕоһун ойутан киллэрдэ. Дьэ, уонна иккиэйэҕин омоллоон олоҕун, ый ыһыаҕын ыстыбыт, кыратык “кылк” гыннардыбыт, аан дойду сонунун түөрэ кэпсэттибит.
Киһиэхэ кыра да наада. Ити курдук тириим тэнийиэр диэри сэһэргэспиппин өтөрүнэн өйдөөбөппүн. Буоларын курдук, уруккуну-хойуккуну санаһан баран, Арассыыйа, аан дойду бэлиитикэтин бүтэрдибит, куолу бөҕөтүн куолулаатыбыт, аныгы олоҕу ыатардыбыт.
Көр, мин биири муодаргыы иһиттим. Быраатым, бэрдин бэрт, биир хостоох эргэ кыбартыыралааҕын куортамныыр эбит. Онто куортамҥа барбакка эрэйдээбит.
— Көр, кинилэргэ тобус-толору миэбэл, холодильник уонна хайаан да таҥас сууйар аптамаат массыына наада үһү. Эргэ да буоллар, миэбэллээх ээ. Ону иккис ыйытыыларынан: “стиралкалаах дуо?” диэн буолар. Ол суох буолан, дьэ, моһуоктаата. Куоракка саҥа дьиэ элбээн, куортам сыаната түспүт, дьон да ирдэбилэ уларыйбыт эбит, — диэн кэпсээтэ.
Хайа, ол аата билигин ким да илиинэн таҥас сууйбат буолбут буоллаҕа дуу? Ыччаттарбыт хотоҥҥо, окко үлэлиэхтээҕэр, ис таҥастарын да сатаан сууммат буолаахтаатахтара дуу? Дьэ, буолан истэхпит… Оннооҕор мин эмээхсиним кыра таҥаһын бэйэтэ илиинэн сууйарын ордорор ээ, массыынаҕа утуйар таҥаһы уонна, чэ, мин халҕайбыт ыстааннарбын сууйтарар. Биирдэ ырааҕынан аймахпыт кыыс үөрэххэ туттарса кэлэн баран, кылгас кэмҥэ биһиэхэ олорбута. Кыыс миини да сатаан буһарбат этэ. Көстүрүүлэҕэ тоҥ эти, хортуосканы, лапсаны барытын бииргэ кутан буһарбыт этэ, көр бөҕө буолбута, хааһы буолбут миини иһэн турардаахпыт. Эмээхсиним кинини бэрт түргэнник астыырга үөрэппитэ ээ. Билигин ыал ийэтэ буолан, бэркэ олорор сурахтаах.
Сотору, били дьоппуоннарга курдук, дьиэни робот, иһити массыына сууйар кэмэ кэлиэҕэ. Өссө туохпутун робот солбуйар? Интэриниэт, тиэхиньикэ сайдыы көрүҥэ дииллэр эрээри, эчи, арах, биһиги курдук дьоҥҥо хайдах дьаалыйара буолла? Ыччаппыт сүрэҕэ суох күөх көппөлөргө эрэ кубулуйбатар!
Биэтэс Билээхэп.