Илиҥҥи экэнэмиичэскэй форумҥа Саха сирин инвестиционнай кыаҕын көрдөрдүлэр
Владивостокка Илиҥҥи экэнэмиичэскэй форум кэмигэр Саха Өрөспүүбүлүкэтин эрэгийиэнин кыаҕын уонна инвестицияны тардыытын көрдөрдүлэр.
edersaas.ru
Саха сирин баһылыга Айсен Николаев дойду бэрэсидьиэнэ Владимир Путин 2024 сылга диэри Арассыыйа экэниэмикэтэ аан дойду биэс кыахтаах экэниэмикэтигэр киириэхтээҕин туһунан соругу туруорбутун бэлиэтээтэ. Бу соругу хамсатыылаахтык дьаһанар эрэгийиэннэргэ уонна бырайыактарга инвестицияны тардыбакка эрэ толорор кыаллыбат.
“Биһиги бүгүн Арассыыйа тэтимнээхтик сайдар эрэгийиэннэриттэн биирдэстэрэбит. Былырыын бырамыысыланнас оҥорон таһаарыыта 8 бырыһыантан тахсыбыта. Быйыл сыл бастакы аҥаарыгар бу сыыппара 11 бырыһыаҥҥа тэҥнэһэр. Бу дойдубутугар бу кэмҥэ үчүгэй көрдөрүүлэртэн биирдэстэрэ буолуохтаах”, — диэтэ Айсен Николаев.
Эрэгийиэн баһылыга өрөспүүбүлүкэ инвестиционнай кыаҕа улаханын бэлиэтээтэ. Сайдыы институттарын тиһигин уонна экэниэмикэ саҥа сектордарын тэрийии көмөтүнэн Саха сирэ Уһук Илиҥҥэ тардыбыт инвестициятын кээмэйинэн олох инники сылдьар.
Саха сирэ инвестордарга табыгастаах сиринэн буолар. Бырабыыталыстыба аһаҕас үлэтэ, биисинэһи кытта ыкса сибээс, бырайыактыыр управление эрэгийиэн инвестиционнай килиимэти олохтооһун национальнай рейтинигэр инники күөҥҥэ тахсарыгар кыаҕы биэрдилэр.
“Биһиги 52-с миэстэттэн 22 миэстэҕэ таҕыстыбыт. Ол иһин дойду Бэрэсидьиэнин сорудаҕын – 2020 сылга Уһук Илин эрэгийиэннэрэ Арассыыйаҕа 30 иһигэр киириэхтээхтэрин, толордубут. Бүгүн Уһук Илиҥҥэ инвестицияҕа инники иһээччи быһыытынан биһиги макроэрэгийиэн валовой бородууктатын 20 бырыһыанын, Уһук Илин нолуогу төлөөччүлэриттэн федеральнай бүддьүөккэ 34 бырыһыаны хааччыйабыт”, — диэн иһитиннэрдэ Айсен Николаев.
Саха сирэ Арассыыйа уон эрэгийиэнин иһигэр биир киһиэхэ тиксэринэн валовой эрэгийиэннээҕи бородуукта кээмэйинэн киирэр. Былырыын бу көрдөрүү триллион солкуобайы куоһарбыта. Бу Арассыыйаҕа 20-с уонна Уһук Илиҥҥэ бастакы миэстэ. Уопсайынан ыллахха, экэниэмикэ көрдөрүүтэ 2013 сылтан 1,8 төгүлгэ тэҥнэһэр. Инвестиция кээмэйэ икки төгүлтэн ордук улаатта.
“Мин санаабар, бу саамай дьоһун суолталаах бырайыак. Билигин биһиги Уһук Илиҥҥэ нэһилиэнньэ төрөөһүнэ аччаабатах соҕотох дойдунан буолабыт”, — диэтэ Айсен Николаев.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата