Бу күннэргэ Владивосток куоракка VII-c Илиҥҥи экэнэмиичэскэй пуорум ыытылла турар. Пуорумҥа Ил Дархан Айсен Николаев салайааччылаах Саха сирин делегацията кыттар. Саха сирэ социальнай уонна экэниэмикэ эйгэтигэр кырата 30 инвестиция туһунан сөбүлэһиилэргэ илии баттаһар былааннаах. Номнуо бүгүн хас да сөбүлэһии түһэрсилиннэ.
Былырыын өрөспүүбүлүкэ 25 млрд солк. суумалаах инвестиция туһунан сөбүлэһиилэри түһэрсибитэ. Холобур, ааспыт сыл сөбүлэһиилэрин түмүгүнэн, үгүс социальнай эбийиэктэри тутууга тэҥҥэ үбүлээһин ситиһиллибитэ, Дьокуускай, Нерюнгри куораттар территорияларыгар тутуулар ыытыллыбыттара, “САССР 100 сылыгар – 100 оптуобус” бырагыраама чэрчитинэн дьону тиэйэр тырааныспар паарката саҥардыллыбыта. Үөһээ Дьааҥы улууһун Улахан Күөл нэһилиэгэр маҥнайгы гибриднай электроыстаансыйа үлэҕэ киирбитэ. Бу ыстаансыйа 2024 сылга диэри тутуллуохтаах 72 ыстаансыйалартан биирдэстэрэ.
Бүгүн Саха сирэ уонна «РусГидро» Амма улууһугар энергетическэй инфраструктураны сайыннарыыга уонна уотунан эрэллээхтик хааччыйыыга сөбүлэһии түһэристилэр. Ол курдук, сөбүлэһии «Сулҕаччы — Амма» үрдүк күүрүүлээх уот линиятын, 110 кВ кыамталаах «Амма» подстанциятын тутууга туһуланар.
Маны таһынан Ил Дархан Айсен Николаев Амурскай уобалас губернатора Василий Орловтыын Дьалында (Джалинда, Амурскай уобалас) – Мохэ (КНР) хайысхатынан тимир суол муостатын тутуу туһунан кэпсэттилэр. Тутуу бырайыагын быһыытынан, Амур өрүһү туорааһыҥҥа Дьалында — Мохэ (Кытай Хэйлунцзян провинцията) хайысхатынан саҥа пууну тутуу буолар.
Пуорум үлэтин иитинэн, Муома улууһугар гибриднэй энергетическэй комплексы үөрүүлээх быһыыга-майгыга үлэҕэ киллэрии сиэрэ-туома ыытылынна. Эбийиэк үлэҕэ киирэн, сыллата 980 тыһ. туонна дизельнэй уматык кэмчилэниэҕэ.
edersaas.ru
+1
+1
+1
+1
+1
+1
+1