Балаҕан ыйын 2-4 күннэригэр Владивосток куоракка үгэскэ кубулуйбут Илиҥҥи экэнэмиичэскэй пуорум ыытыллаары турар. Пуорум быйылгы дьыалабыай бырагырааматын «Экономика нового времени: что изменится и что сохранится», «Дальний Восток – новые вызовы и возможности», «Общая ответственность в изменившемся мире» уонна «Молодежный ВЭФ» диэн салааларга араарбыттар.
Дойду Аҕа баһылыга Владимир Путин Уһук Илиҥҥи уокуругу сайыннарыыны үлэ биир сүрүн хайысхатынан ыйыаҕыттан, кэлиҥҥи сылларга туһааннаах эрэгийиэни сайыннарыыга үрдүкү салалтаттан улахан болҕомто ууруллар буолла. Ол курдук, урутаан сайдар сири-уоту тэрийиигэ, инвестиция бырайыактарын өйөөһүҥҥэ федеральнай бүддьүөттэн үгүөрү үп-харчы тыырыллар. Маны таһынан, Уһук Илиҥҥи уокурукка олох таһымын үрдэтиигэ — оҕо уһуйаанарын, оскуолалары тутууга, олорор дьиэнэн хааччыйыыга эмиэ болҕомто киинигэр тутуллар. Нэһилиэнньэ ахсаанын элбэтиигэ былааннаах үлэ ыытыллан, уокурук олохтоохторугар уонна атын эрэгийиэннэртэн көһөн кэлээччилэр “Босхо гектар” бырагырааматынан хото туһанар буоллулар.
Аҕыйах сылтан бэттэх, быһаччы Уһук Илин уокуругар инвестицияны тардыыга анаан Илиҥҥи экэнэмиичэскэй пуорум ыытыллан, кэскиллээх инвестиционнай бырайыактар олоххо киирэллэригэр төһүү күүһүнэн буолла.
РФ бырабыыталыстыбатын бэрэссэдээтэлин солбуйааччы, РФ бэрэсидьиэнин Уһук Илиҥҥи федеральнай уокуругун боломуочуйалаах бэрэстэбиитэлэ Юрий Трутнев: «Уһук Илини сайыннарыы Арассыыйаҕа XXI үйэ тумус туттуллар национальнай интэриэһэ буоларын туһунан дойду баһылыга бэлиэтээн этэн турар. Онон Уһук Илини өйөөһүн биир тутаах тэрээһининэн Илиҥҥи экэнэмиичэскэй пуорум буолар. Пуорум сүрүн сыала уонна соруга — инвестордары тардыы. Билиҥҥитэ уопсайа 2,5 тыһыынча кэриҥэ саҥа бырайыактар оҥоһулланнар, 1,9 трлн солкуобайдаах инвестиция тардылынна», — диэн иһитиннэрбитин ТАСС ааҕыныстыба суруйда.
Үөһээ этэн аһарбыппыт курдук, быйылгы пуорум түөрт салааҕа араарыллыбыт. Холобур, «Дальний Восток – новые вызовы и возможности» диэн салаа 28 сиэссийэттэн турар. Бу манна инвестицияны тардыы, сиртэн хостонор баайы-дуолу экспорка таһаарыы кыахтарын, тыа хаһаайыстыбатын салаатын сайыннарыы тула кэпсэтиэхтэрэ. Бүгүҥҥү туругунан Уһук Илин алмааһы, таас чоҕу, алтаны, сибиниэһи, вольфрамы, кыһыл, үрүҥ көмүһү хостооһуҥҥа дойду үрдүнэн инники күөҥҥэ сылдьар. Онон, туһааннаах сиэссиэйэни ордук тас дойду инвестордара интэриэһиргиэхтэрэ.
Илиҥҥи экэнэмиичэскэй пуорум иитинэн «Арассыыйа — АСЕАН», «Арассыыйа — Корея», «Арассыыйа — Япония», «Арассыыйа — Кытай», «Арассыыйа — Индия», «Арассыыйа — Европа» диэн биисинэс-кэпсэтиилэр ыыттыллаллара былааннанар.
Быйылгы тэрээһин эмиэ буоларын курдук, Азия-Тиихэй акыйаан эрэгийиэнигэр дьоһун суолталаах кэпсэтии былаһааккатынан буолара күүтүллэр. Пуорум тэрийэр кэмитиэтин эппиэттээх сэкирэтээрэ Антон Кобяков иһитиннэрбитинэн, судаарыстыбалар бас-көс салайааччыллара миэстэтигэр кэлэн уонна онлайн эрэсииминэн кыттыахтара.
ВРЕЗКА
VI-с Илиҥҥи экэнэмиичэскэй пуорум иитинэн ыытыллар «Уһук Илин уулуссалара» быыстапкаҕа 11 эрэгийиэн экспозицията туруоруллуоҕа. Оттон “Инникитин Саха сирин кытта” павильон сахалыы моһуоннаах оҥоһуллуохтааҕын туһунан СИА суруйар. Экспозициялар хас даҕаны салаалартан туруохтара. Ол иһигэр Саха сирин кытары үлэлэһэр хампаанньалар, өрөспүүбүлүкэ социальнай-экэнэмиичэскэй сайдыытын туһунан иһитиннэриилэр, истиэндэлэр баар буолуохтара. «Made in Yakutia» салаа быыстапка-дьаарбаҥка быһыытынан үлэлээн, Саха сирин оҥорон таһаарааччылара бэйэлэрин оҥоһуктарын илдьэн көрдөрүөхтэрэ. Атыыга таһаарыахтара.
edersaas.ru