Илиҥҥи экэнэмиичэскэй пуорумҥа Дмитрий Чернышенко Саха сирин цифровой сайдыытын бэлиэтээтэ
Илиҥҥи VII экэнэмиичэскэй пуорумҥа дьыалабыай бырагыраама чэрчитинэн «Восток России 2.0! Региональные драйверы цифрового развития в новой реальности” диэн сиэссийэ ыытылынна.
Сиэссийэни РФ бырабыыталыстыбатын бэрэссэдээтэлин солбуйааччы Дмитрий Чернышенко ыытта. Сиэссийэҕэ Уһук Илиҥҥи уокурук эрэгийиэннэрин губернатордара уонна СӨ Ил Дархана Айсен Николаев кыттыыны ыллылар.
Сиэссийэ кэмигэр Дмитрий Чернышенко өрөспүүбүлүкэбит цифровой сайдыыга Арассыыйаҕа 11 миэстэни ситиһиилээхтик ыларын уонна IT исписэлиистэрэ үрдүк таһымнаахтарын, бу хайысхаҕа өрөспүүбүлүкэ өйөбүлэ көдьүүстээҕин бэлиэтээтэ.
2018 сыллаахха Ил Дархан Айсен Николаев эрэгийиэҥҥэ инновационнай уонна цифровой сайдыы туһунан уураахха илии баттаабыта.
СӨ инновацияҕа, цифровой сайдыыга уонна инфокоммуникационнай технологияларга миниистирэ Анатолий Семенов:
— Уһук Илин уокурукка биһиги эрэгийиэммит IT өҥөтүн экспортыыр биир үрдүк көрдөрүүлээх эрэгийиэннэринэн буолар. Бүгүҥҥү күҥҥэ 13 тыһыынча км ВОЛС тутулунна. Өрөспүүбүлүкэ нэһилиэнньэтин 91.2%-на олорор 373 нэһилиэнньэлээх пууннарга бу ситимҥэ холбоннулар. Бу сыл бастакы аҥаарын түмүгүнэн өрөспүүбүлүкэбит дойду эрэгийиэннэрин икки ардыгар цифровой сайдыыга алтыс миэстэни ылар.
Ульяна ЗАХАРОВА.