Бүгүн Дьокуускайга, «Триумф» Спорт киинигэр саҕаламмыт Саха Өрөспүүбүлүкэтин Ил Дарханын бирииһигэр дзюдоҕа Бүтүн Арассыыйатааҕы турнирга дойду аҕыс регионуттан уонна Монголияттан 400-тэн тахса спортсмен кыттар.
Ил Дархан Егор Борисов күрэхтэһии үөрүүлээхтик арыллыытыгар күрэс кыттыылаахтарын эҕэрдэлииригэр өрөспүүбүлүкэҕэ дзюдонан билигин 2 500 оҕо дьарыктанарын, спорт бу көрүҥэ Саха сиригэр тустууну, боксаны, хапсаҕайы сэргэ күүскэ сайыннарылларын, кэнники сылларга уһун кэмҥэ күүппүт кыайыыларбыт ситиһиллибиттэрин бэлиэтээтэ, онуоха инникитин бүгүҥҥү күрэхтэһии төһүү буолуоҕар эрэнэрин эттэ.
Күрэхтэһии ыҥырыылаах ыалдьыта, Олимпийскай оонньуулар икки төгүллээх призердара Тамерлан Тменов Ил Дархан бирииһигэр Бүтүн Арассыыйатааҕы турнир үтүө үгэскэ кубулуйан, сыллата кыттааччытын ахсаана эбиллэн иһиэҕэр эрэнэрин эттэ, биһиги Ийэ дойдубут күүстээх буолуохтаах диэн туран, дзюдо санааны күүһүрдэрин, ону дойду бэрэсидьиэнэ Владимир Путин бэйэтин холобурунан көрдөрөрүн ыйда.
Санатан эттэххэ, күрэхтэһии уон аҕыстарыттан аҕа эр дьон, дьахталлар уонна 2002-2004 сыллардааҕы юниордар, 2005-2007 сс. төрүөх уолаттар, кыргыттар ортолоругар ыытыллар.
Роман Попов, «Саха сирэ» хаһыат