Ил Дархан миэдиктэргэ саҥа соруктары туруорда

Бөлөххө киир:

Айсен Николаев кардиологтары, неврологтары уонна мэдиссиинэ тэрилтэлэрин кылаабынай быраастарын кытары көрүстэ. Манна РФ доруобуйа харыстабылын миниистирэ Михаил Мурашко федеральнай эспиэрдэр хамаандаларын кытары кэлэ сылдьан, туруорбут соруктарын, былааннарын ырытыһыы буолла.

Ил Дархан миэдиктэргэ «Доруобуйа харыстабыла” Национальнай бырайыак хайысхаларын ситиһэр туһунан кэккэ соруктары туруорда. Бастатан туран, нэһилиэнньэҕэ дириҥник ыытыллар диспансеризация уонна эрдэттэн көрүү-истии хаамыытын улаатыннарарга сорудахтаата.

Пандемия мэһэйэдээн, диспансеризация көрдөрүүтэ намтаабыта. Нэһилиэнньэ 37%-на эрэ, ол эбэтэр 257 тыһыынча кэриҥэ киһи икки сылы быһа балыыһаҕа сылдьыбатахтара бэлиэтэммит. СӨ доруобуйа харыстабылын миниистирэ Лена Афанасьева иһитиннэрбитинэн, билигин диспансеризация көрдөрүүлэрэ тупсан эрэллэр.

Сүрэх-тымыр киинэ тутуллан, үлэҕэ киирэн, кардиологоияҕа уонна неврологияҕа балаһыанньа лаппа тубуста. Манна сүрэххэ-тымырга үрдүк технологиялаах хирургическай мэдиссиинэ көмөтө оҥоһуллуоҕа. Теле-мэдиссиинэ көмөтүнэн тэйиччиттэн үлэлиир консультациялыыр киин аһыллан, үлэтин саҕалаата. Бу киин улуустааҕы кардиологтарга көмө буолуоҕа, туох баар суһаллык уонна былаанынан оҥоһуллар мэдиссиинэ көмөтүн туһунан информация түмүллүөҕэ. Хас биирдии пациеҥҥа ураты сыһыан олохтонуоҕа, холобур, сүрэх ыарыылаах оҕо төрөөтөҕүнэ, олоҕун тухары быраастар кэтээн көрүөхтэрэ.

Бу сыл бүтүөр диэри сүрүннээн Арктика улуустарыгар 50 нэһилиэнньэлээх пууну хабан, тэйиччиттэн үлэлиир ЭКГ аппарааттар ситимнэрин киллэриэхтэрэ. Манна ЭКГ-аппарааттар кардиокиин биир кэлим ситимигэр холбонуохтара.

Сүрэх ыарыыларын сэрэтэр үлэни күүһүрдүөххэ наадатын мунньах кыттыылаахтара ыйдылар. Саҥа кардиокииҥҥэ сүрэх тымырдарын кэҥэтэргэ, инфаркты сэрэтэргэ туһаныллар стенты – каркааһы туруорар, түргэнник оҥоһуллар эппэрээссийэлэри номнуо оҥорон эрэллэр.

Доруобуйа харыстабылын министиэристибэтин штаты таһынан кылаабынай невролога Татьяна Николаева этэринэн, “ковид” кэннэ инсульт содулларын аҕыйатарга тромболитическай терапияны оҥорууну элбэтиэххэ наада. Маннык эмтииргэ тымырга үөскүүр бүөнү (тромбаны) суурайан кэбиһэллэр. Маннык көмөнү телемэдиссиинэ нөҥүө улуус балыыһаларыгар да оҥоруохтарын сөп, өскөтүн кардиокиинтэн сүбэһит баар уонна көмпүүтэр томографията, реанимация балаатата баар буоллахтарына.

Мунньаҕы түмүктүүрүгэр Айсен Николаев миэдиктэри кытары маннык көрсүһүүлэр өссө да буола туруохтара диэн эттэ.

Өрөспүүбүлүкэҕэ хаачыстыбалаах мэдиссиинэ өҥөтүн оҥорууга, ФАП-тартан саҕалаан, үрдүк технологиялаах аныгы кииннэри тутуу, анал тэриллэри атыылаһыы, каадырдары бэлэмнээһин үлэтэ ыытыллар, инфраструктура тэриллэр. Мэдиссиинэ көмөтүн оҥорорго наадалаах систиэмэ тутулунна, билигин ону көдьүүстээхтик туһаныахха наада, — диэн кини эттэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

+1
0
+1
0
+1
0
+1
0
+1
0
+1
0
+1
0