Атырдьах ыйын 21 күнүгэр Госдуумаҕа буолбут парламент истиилэригэр Ил Түмэн бэрэссэдээтэлэ Александр Жирков уонна судаарыстыбаннай тутулга, сокуону оҥорууга сис кэмитиэтин салайааччы Алексей Еремеев кыттыбыттара.
Санатар буоллахха, бу дьыл от ыйын 9 күнүгэр Ил Түмэн киэҥ ыҥырыылаах сэбиэтигэр дьокутааттар туһааннаах боппуруоһу дьүүллэспиттэрэ. Ол түмүгүнэн, өрөспүүбүлүкэ нэһилиэнньэтин интэриэһин туруулаһар этиилэри Госдума көрүүтүгэр ыыппыттара.
Ил Түмэн сүрүн туруорсуута:
Саха сиригэр, Уһук Хотугу с ир оройуоннарыгар уонна онно тэҥнэниллибит сирдэргэ үлэлээбит гражданнарга, хотугу аҕыйах ахсааннаах төрүт олохтоох омуктарын биэнсийэҕэ тахсар саастарын уларыппакка, оннунан хаалларыы. Итиэннэ Уһук Хотугу сир оройуоннарыгар уонна онно тэҥнэниллибит сирдэргэ үлэлээбит дьонтон ураты атын гражданнарга биэнсийэҕэ тахсар сааһы үрдэтии хаамыытын биир сылтан сыл аҥаарыгар диэри уларытыы.
Владимир Путин кэнники этиитигэр Саха сирин парламенын үгүс этиилэрэ сөп түбэһэллэр. Холобур, аҕыйах ахсааннаах хотугу норуоттар бэрэстэбиитэллэригэр биэнсийэҕэ тахсар сааһы оннунан хаалларыы, тыа сирин үлэлээбэт биэнсийэлээхтэригэр (тыа хаһаайыстыбатыгар 30 сыл ыстаастаах буоллаҕына) страховой биэнсийэлэригэр 25% эбиллэрин ситиһии, о.д.а.
Александр Жирков этэринэн, бүгүҥҥүттэн бу сокуон барылыгар үлэҕэ саҥа түһүмэх саҕаланар. Ил Түмэн Уһук Илин атын регионнарын парламеннарын, Госдуума дьокутааттарын кытары биир тылга кэлэр туһугар үлэни ыытар.
Санатар буоллахха, атырдьах ыйын 21 күнүгэр буолбут Госдума парламеннааҕы общественнай истиилэригэр биэнсийэ тиһигэр уларытыылары киллэрэр сокуон барылын ситэрэн оҥорууга Госдумаҕа рабочай бөлөх тэриллибитэ. Бөлөҕү Госдума бэрэссэдээтэлин солбуйааччы Ольга Тимофеева салайар. Онно Госдума бары фракцияларын итиэннэ Дума 5 кэмитиэтин бэрэстэбиитэллэрэ, профсоюзтар Бүтүн Россиятааҕы кэмитиэттэрин уонна үлэ биэрээччилэр холбоһуктарын салайааччылара, РФ правительствотын, Пенсионнай фонда, РФ Счетнай палататын уонна научнай тэрилтэлэр бэрэстэбиитэллэрэ киирдилэр.
Саха сирин парламенын спикерэ Александр Жирков атырдьах ыйын 30 күнүгэр СӨ правительствотын председателин солбуйааччы э.т. Ольга Балабкина, Үлэ уонна социальнай сайдыы миниистирэ Александр Михеев, Ил Түмэн доруобуйа харыстабылыгар итиэннэ социальнай харысхалга, үлэҕэ уонна дьарыктаах буолууга сис комитетын салайааччыта Александр Корякин кыттыылаах Саха сиригэр пенсия туһунан сокуону ситэрэн оҥорууга Ил Түмэн мунньаҕын салайан ыытта. Александр Жирков этэринэн, ити сокуон бырайыагар үлэ саҥа түһүмэҕэ саҕаламмыт. Саха сирин парламена уонна правительствота көхтөөх үлэни салгыы ыыталлар. Илин Уһук федеральнай уокуругун субъектарын итиэннэ Госдума депутаттарын кытта сөбүлэһиннэрии үлэтэ бара турар. Александр Жирков быһаччы дьаһалынан СӨ правительствотын бэрэссэдээтэлин солбуйааччы Ольга Балабкина салайааччылаах рабочай бөлөх тэриллэн, сокуон барылыгар парламентан киирэр этиилэри кытта үлэ тэрилиннэ.
Ангелина Васильева, edersaas.ru